આ પરમ મિત્રની આમ લઈએ સારસંભાળ

ભેજથી માંડી ઊધઈ સહિતનાં જોખમથી પુસ્તકોને કઈ રીતે બચાવવાં? ચાલો, જાણીએ.. 

- વિશ્વા મોડાસિયા

પુસ્તક માણસનો સૌથી સારો મિત્ર કહેવાય છે. પુસ્તક ફક્ત તમારા જ્ઞાનમાં જ વધારો નથી કરતાં, પરંતુ જીવનના ઘણા મહત્ત્વપૂર્ણ પાઠ પણ શીખવે છે. નવી પેઢીમાં ડિજિટલ બુક્સની બોલબાલા વધી છે. જો કે આજે પણ ઘણા લોકો એવા છે જેમને હાથમાં વર્તમાનપત્રની જેમ જ પુસ્તક લઈ વાંચવું ગમે છે. સમય સાથે લોકોની વાંચનની આદત બદલાઈ રહી છે, પણ આજેય અનેક ઘર એવાં હશે, જ્યાં આપણને પુસ્તકો જોવા મળે.

જેમ આપણે આપણી દોસ્તી બરાબર સાચવીએ છીએ એમ સાચા મિત્ર સમાં પુસ્તકોને પણ બરાબર જાળવવાં જરૂરી છે. પુસ્તક જૂનાં થતાં જાય એમ એનાં પાનાં ફાટી જવાનો અથવા તો ઊધઈ જેવા જીવજંતુથી ખરાબ થવાનો ડર રહે છે. આ બધાં સંભવિત જોખમથી આપણે પુસ્તકોને બચાવવાનાં છે. તો ચાલો, આ વખતે આ દોસ્તની સારસંભાળ વિશે કરીએ વાત..

પુસ્તકની સંભાળની વાત આવે તો પ્રથમ નિયમ છે પુસ્તકની સ્વચ્છતાની કાળજી લેવાનો. ઉદાહરણ તરીકે, પુસ્તકોને ગંદા હાથથી ક્યારેય અડવું નહીં. હાથ ભીના કે તેલવાળા હોય ત્યારે પણ નહીં. જો જમતી વખતે વાંચવાનો શોખ હોય તો સાથે એક નૅપ્કિન રાખો, જેથી જ્યારે પાનાં ફેરવવાં હોય તો ગંદા હાથ લૂછીને પાનાં ફેરવી શકાય.. અને હા, ખાદ્ય પદાર્થોને પુસ્તકથી દૂર રાખો.