ધ્વનિ શાહ: ભલે કિતને લમ્બે રાસ્તે હો.. થકે ના તેરા તન હો

રાજકોટની એક મધ્યમવર્ગી પરિવારની દીકરીએ શારીરિક-આર્થિક-માનસિક પડકારોનો સામનો કરી, તમામ કઠણાઈથી ટકરાઈને ટેબલ ટેનિસ સાથેનો લગાવ જાળવી રાખ્યો. એટલું જ નહીં, પણ રાષ્ટ્રીય કક્ષાની સ્પર્ધા જીતી હવે એ આંતરરાષ્ટ્રીય મેદાનમાં ઊતરી છે.

- દેવેન્દ્ર જાની

સાતેક વર્ષની કુમળી કન્યાના એ ઊછળકૂદના દિવસો હતા. એને હસતી–રમતી જોઈ માતા-પિતાને હરખની, અપાર સંતોષની લાગણી થતી. સોની વહાલી એ બાલિકાનું હજી તો માંડ અભ્યાસમાં મન લાગ્યું હતું ત્યાં અચાનક એક ગંભીર બીમારીએ એનું બાળપણ છીનવી લીધું. ડૉક્ટરે નિદાન કર્યુંઃ કૅન્સર. મગજમાં ગાંઠ. અને..

‘...અને અમારા પગ તળેથી જાણે ધરતી ખસી ગઈ. થોડા દિવસ ખૂબ ચિંતા કરી. છેવટે પરિસ્થિતિ સ્વીકારી લીધી.. મન મક્કમ કરીને કાચી વયે દીકરીના બ્રેન ટ્યુમરની સર્જરી કરાવી..' આટલું બોલતાં એ દીકરીની માતાના ગળે ડૂમો ભરાઈ આવે છે, પણ તરત જ સ્વસ્થ થઈને એ કહે છે: ‘હવે, જો કે માનસિક સંતાપ, સંઘર્ષ અને ચિંતાનું પોટલું વાળીને મૂકી દીધું છે.’

એનું નામ ધ્વનિ શાહ. એ ફૂલ શી કોમળ દીકરી આજે પચ્ચીસની થઈ ગઈ છે. ચાર-ચાર વાર કૅન્સરની બીમારીમાં સર્જરી કરાવી, પણ હિંમત હારી નથી. પ્રિયદર્શિનીએ જ્યારે ધ્વનિની મુલાકાત લીધી ત્યારે એ ઈન્ટરનૅશનલ ટેબલ ટેનિસ ફેડરેશન દ્વારા જોર્ડનમાં આયોજિત પૅરા ચૅમ્પિયનશિપમાં ભાગ લેવા જવાની તૈયારી કરી રહી હતી. ચિત્રલેખાનો આ અંક આપના હાથમાં હશે ત્યારે ધ્વનિ જોર્ડનમાં હશે.

રાજકોટના રેસકોર્સના ઈનડોર સ્ટેડિયમમાં ધ્વનિને ટેબલ ટેનિસ રમતી કોઈ જુએ તો પહેલી નજરે એ નૉર્મલ ખેલાડી જ લાગે, પણ પાસે જઈ એની સાથે વાત કરીએ ત્યારે નાની ઉંમરે એણે વેઠેલો સંઘર્ષ ધ્રુજાવી મૂકે છે. એ ૧૬ વર્ષની થઈ ત્યાં સુધીમાં તો એના મગજ પર ચાર શસ્ત્રક્રિયા થઈ ચૂકેલી. એમાં પણ છેલ્લી જટિલ શસ્ત્રક્રિયા વખતે ધ્વનિને પૅરાલિસિસનો અટેક આવ્યો, ડાબી બાજુનું અંગ ખોટું થઈ ગયું. આમ છતાં એણે મનોબળ મજબૂત રાખી શારીરિક પડકારો વચ્ચે ટેબલ ટેનિસ રમવાનું ચાલુ રાખ્યું.