ઘર બદલાયું.. વિચાર અને વૃત્તિ બદલાશે?

સંસદ ભવનની નવી ઈમારતનું ઉદ્ઘાટન જ સરકાર અને વિપક્ષી આગેવાનો વચ્ચે વિવાદનું કારણ બન્યું. લોકશાહીના મંદિર તરીકે જેની પૂજા થાય છે એ સંસદગૃહ માટે પ્રથમ ગ્રાસે જ મક્ષિકા જેવો આ ઘાટ છે. કમ સે કમ એક દિવસ પૂરતો પણ વિખવાદને કોરાણે મૂકી આપણા નેતાઓ ઉદ્ઘાટનવિધિની ગરિમા ન જાળવી શક્યા.

- હીરેન મહેતા

સંસદ ભવનની નવી ઈમારતના ઉદ્ઘાટન અવસરે વડા પ્રધાન નરેન્દ્ર મોદીઃ વિપક્ષી આગેવાનોએ આ એક દિવસ ‘સાચવી’ લીધો હોત તો?

વ્યવહારકુશળ માણસ એને કહેવાય જે સમય કે પ્રસંગ સાચવી લે. આપણી સતત બદલાતી જીવનશૈલી કહો કે વર્તમાન સમયના તણાવને દોષ આપો, સામાન્ય માણસની સહિષ્ણુતા હવે અગાઉ જેવી રહી નથી. આ વિધાન અત્યારે હયાત એવી દરેક વ્યક્તિને ભલે લાગુ ન પડે, પણ પહેલાંની જેમ ગમ ખાઈને લોકો હવે બેસી રહેવા તૈયાર નથી. અમુક સંજોગમાં આ વાત સારી પણ હોઈ શકે, પરંતુ ક્યારેક પ્રસંગનું ઔચિત્ય જાળવવામાં એવું સમાધાન કરવામાં વાંધો ન હોવો જોઈએ.

રવિવારે વડા પ્રધાન નરેન્દ્ર મોદીએ સંસદ ભવનની નવી ઈમારતનું ઉદ્ઘાટન કર્યું એ અવસર વખતે દેશના ઘણાખરા વિપક્ષી આગેવાનો એ ઔચિત્ય ચૂકી ગયા. નાના-મોટા, કુલ ૨૧ પક્ષના નેતાઓએ આ ઉદ્ઘાટન પ્રસંગનો બહિષ્કાર કર્યો. યુરોપના કેટલાક દેશ અને અમેરિકાની સંસદ કે પ્રતિનિધિસભાની ઈમારત આપણા સંસદ ભવન કરતાં પણ પહેલાં બંધાયેલી છે એટલે આપણે નવા મકાનની જરૂર નથી.. અને એથી પણ વિશેષ તો સંસદની નવી ઈમારતનું ઉદ્ઘાટન વડા પ્રધાને નહીં, પરંતુ રાષ્ટ્રપ્રમુખ દ્રૌપદી મુર્મુએ કરવું જોઈએ.. એવાં જુદાં જુદાં કારણ આગળ ધરવામાં આવ્યાં બહિષ્કાર માટે.