આશીની માસી

એક જ છીંક આવે તો અપશુકન થાય? અમેરિકા રહીને પણ તમે એવું માનો છો, બોલો?

- સુષમા શેઠ

અડધી રાતે આશીનો મોબાઈલ ફોન રણક્યોઃ ‘હેય, હું અને સેમ ફિફ્થ અર્લી મોર્નિંગે મુંબઈ પહોંચીએ છીએ. કમ ટુ પીક અસ અપ ફ્રૉમ ધ ઍરપોર્ટ. ઓકે?’

‘શીલા માસી!’ આશી પલંગ પર ઊછળી. એણે આનંદની કિકિયારીઓ પાડી. સામાન્યતઃ વંદાને જોઈને ચિચિયારી પાડતી આશીને આમ ઊછળતી જોઈ અમિત ઊંઘમાં જ બોલ્યો: ‘ક્યાં છે? ક્યાં છે?

ઊંઘતા અમિતને ઢંઢોળીને આશીએ શુભ સમાચાર આપ્યાઃ ‘અમેરિકાથી શીલા માસી અને એમનો સન સેમ આવવાનાં છે.’

‘વ્હૉટ!’ સાંભળીને અમિત પણ ઊછળ્યોઃ ‘મારે અમેરિકા જતા રહેવું છે. એમને કહેજે.. પાછાં જતી વખતે મને સાથે લઈ જાય.’

આશીનાં એનઆરઆઈ શીલા માસી એમના સુપુત્ર સમીર ઉર્ફે સેમ માટે છોકરી જોવા ઈન્ડિયા આવી રહ્યાં હતાં. અમેરિકામાં બોર્ન ઍન્ડ બ્રોટપ સેમ માટે દેખાવડી, ભણેલી અને ખાસ તો ભારતીય સમાજમાં ઉછરેલી સંસ્કારી યુવતીની એમને શોધ હતી. આમ તો અમેરિકામાં વસતા દેશીઓ ગરમીના દિવસોમાં ઈન્ડિયા આવવા નહીં, પણ શીલા માસી જેમનું નામ! એમણે સમીરને અહીં આવવા તૈયાર કરી જ લીધો.

એ પરોઢે આશી અને અમિત ઍરપોર્ટ પહોંચ્યાં. માસીને જોતાંવેંત આશી એમને ભેટી પડી. અમિતે સેમ સાથે હાથ મિલાવ્યા ત્યારે એને તો જાણે સ્ટૅચ્યુ ઑફ લિબર્ટી હાથ પહોળા કરી એને આવકારતું હોય એવું નજર સામે દેખાવા માંડ્યું. કાર અને એક ટૅક્સીમાં ચારેય આવ્યાં કે ગારોડિયા પરિવારનું ઘર માસીના કલબલાટથી ગાજી ઊઠ્યું. શાંતિલાલભાઈને ડ્રોઈંગ રૂમમાં શિફ્ટ કરાયા અને એમનો રૂમ મહેમાનો માટે આપી દેવાયો માટે એ વૉકિંગ સ્ટિક લઈ આમથી તેમ આંટા મારતા હતા. કિંગ સાઈઝની ચાર સૂટકેસ ક્વીન સાઈઝના બેડની નીચે સરકાવતાં માસીએ ગીતાબહેનને બાઝીને એમના ગાલને પોતાના ગાલ અડકાડ્યા અને શાંતિભાઈને દૂરથી નમસ્કાર કર્યા.

નાયલોનનું સફેદ ટૉપ અને કાળું પૅન્ટ પહેરેલાં માસીએ સોફામાં પડતું મૂકતાંવેંતઃ ‘ઉફ્ફ કેટલી ગરમી છે.’ કહીઃ ‘એસી કરોને.’નું નમ્ર સૂચન કર્યું. બેડરૂમ બહાર આવેલા મુકેશભાઈને જોતાંવેંત માસીએ હાઈ કરી આંખો નચાવી. એસી ચાલુ જોઈને મકેશભાઈએ ચશ્માં ઊંચાં ચડાવ્યાં, મોઢું વાંકુંચૂકું કર્યું અને હાઈને બદલે હાય.. હાય કર્યું.