આપણે પ્રામાણિક બની રહ્યા છીએ?

કરચોરી અને કર ટાળવાની પ્રવૃત્તિ મુશ્કેલ થતી જાય છે, ટૅક્સ કરતાં પૅનલ્ટી વધુ ભારે પડે છે, ટેક્નોલૉજીના કારણે આઈટી વિભાગના હાથ લાંબા થઈ ગયા છે અને લોકોને પણ ઈમાનદારીથી કર ભરવામાં વધુ સાર અને શાણપણનું મહત્ત્વ સમજાતું જાય છે.

- જયેશ ચિતલિયા

જનક બથિયા: કરમુક્તિનો લાભ લેનારા લોકોએ પણ હવે કર ભરવો પડે છે.

શું આપણા દેશમાં કરદાતા વધી રહ્યા છે? કરચોરો ઘટી રહ્યા છે? કર ભરવાની ઈમાનદારી વધી રહી છે? કે કર ટાળવાની છટકબારી કે મનોવૃત્તિ ઘટી રહી છે? કરવેરાના પાલન પ્રત્યેની સજાગતા કે પ્રામાણિકતા વધી રહી છે?

આવા વિવિધ સવાલ આપણને થઈ શકે છે, કારણ કે છેલ્લાં અમુક વરસથી આવક વેરા રૂપે સરકારને મળતી આવક સતત વધી રહી છે. આઈટી રિટર્ન ફાઈલ કરનારાની સંખ્યા પણ વધી રહી છે. જીએસટી કલેક્શન પણ સતત વૃદ્ધિ પામી રહ્યું છે. આંકડા ભલે એક વાત કરે, હકીકત બીજી વાત પર પણ ધ્યાન દોરી રહી છે. નોંધનીય વાત એ છે કે આ કલેક્શનમાં મહારાષ્ટ્ર ટોચ પર છે, જ્યારે ગુજરાત પાંચમા ક્રમે છે.

સેન્ટ્રલ બોર્ડ ઑફ ડાયરેક્ટ ટૅક્સીસ (સીબીડીટી)ના આંકડા મુજબ નાણાકીય વરસ ૨૦૨૧-૨૨માં આવકવેરાના કલેક્શનમાં મહારાષ્ટ્ર બાદ બીજા, ત્રીજા, ચોથા સ્થાને અનુક્રમે દિલ્હી, કર્ણાટક અને તામિલનાડુ છે. મજાની વાત એ છે કે આર્થિક પ્રવૃત્તિની ગતિવિધિને ધ્યાનમાં રાખતાં આ ટ્રેન્ડ ઘણાં વર્ષોથી આ જ રહ્યો છે. જો કે ગુજરાત જેવું સમૃદ્ધ રાજ્ય પાંચમા ક્રમે હોવાની નવાઈ જરૂર લાગે.