માફિયારાજના ખોફ સામે યોગીનું ત્રીજું નેત્ર

ગયા અઠવાડિયે ઉત્તર પ્રદેશ પોલીસે પ્રયાગરાજના ડૉન અતિક અશરફ અહેમદના બેટાને એન્કાઉન્ટરમાં પતાવ્યો તો એ પછી અતિક અને એના ભાઈને ત્રણ લવરમૂછિયા યુવાનોએ પોલીસની હાજરીમાં ગોળીએ દીધા. અનેક સવાલ ખડા કરતી આ ઘટનાના મૂળમાં છે ક્રિમિનલ-પોલિટિશિયન-પોલીસનું ત્રેખડ..

- બિમલ મહેશ્વરી

થોડાં વર્ષ પહેલાં બિહારમાં એક ડૉક્ટરે આલીશાન મર્સિડીઝ કાર ખરીદી. એ નવીનક્કોર કારને ગુંડા ઉઠાવી ગયા. ચોરી બાદ ડૉક્ટરને ફોન આવ્યોઃ તમે મર્સિડીઝ લીધી તો અમને મારુતિ તો અપાવો.. મારુતિ અપાવો ને તમારી મર્સિડીઝ લઈ જાવ!

ડૉક્ટર થોડા વગદાર હતા. એક ઓળખીતા સાથે એ તો પહોંચી ગયા રાવ લઈને સીધા રાજ્યના શાસક નેતાને ત્યાં, પરંતુ ત્યાંનું દશ્ય જોઈ એ રીતસર ડઘાઈ ગયા. જે ગુંડા એમને મારુતિ અપાવવાની ધમકી આપતા હતા એ જ ગુંડા ત્યાં હાજર હતા! ચુપચાપ ડૉક્ટરે મારુતિ કાર આપી મોંઘીદાટ મર્સિડીઝ છોડાવી લીધી. આ તો બિહારના ગુંડારાજનું એક ઉદાહરણ હતું. બાકી, ઉત્તર પ્રદેશની સ્થિતિ પણ કંઈ બહુ સારી નથી.

છેલ્લા થોડા દિવસથી છાપાં-ટીવીચૅનલોમાં ઉત્તર પ્રદેશના પ્રયાગરાજ (પહેલાંના અલાહાબાદ)ના કુખ્યાત માફિયા ડૉન અતિક અહેમદનો કિસ્સો ગાજી રહ્યો છે. ગયા અઠવાડિયે (૧૫ એપ્રિલે) અતિક અને એના ભાઈ અશરફની ત્રણ શૂટરોએ પોલીસની હાજરીમાં હત્યા કરી. અપહરણ અને હત્યાના એક કેસમાં વળતી સવારે કોર્ટમાં હાજર કરતાં પહેલાં રાતે બન્ને ભાઈને મેડિકલ ચેક-અપ માટે હૉસ્પિટલમાં લઈ જવાતા હતા ત્યારે ટીવી-પત્રકારના સ્વાંગમાં હાજર શૂટરોએ બન્નેની સાવ નજીકથી હત્યા કરી. નજીક એટલે માથે બંદૂક અડાડીને!

અતિકની હત્યાના બે જ દિવસ પહેલાં એના (અતિકના) વચલા દીકરા અસદનું પોલીસે એન્કાઉન્ટર કરેલું. ગણતરીના દિવસોમાં એક જ પરિવારના ત્રણ સભ્યનાં કમોત થયાં એમાં પોલીસની સંડોવણી વિશે ખુલ્લેઆમ ચર્ચા થઈ રહી છે. આવનારા દિવસોમાં કદાચ ઉત્તર પ્રદેશમાં વધુ ખૂનામરકી જોવા મળી શકે.