માઈક્રોપ્લાસ્ટિક્સઃ માનવજાત માટેના આ ખતરાને ઓળખી લો..

..અને એનાથી બચવું હોય તો કોરોનાને દિમાગમાં રાખી માસ્ક પહેરવાનું શરૂ કરો!

- 

ધારો કે તમે સવારમાં ઊઠીને નજીકના ગાર્ડનમાં તાજી હવા ખાવા જતા હોય અને થોડા દિવસમાં તમને શ્વાસની બીમારીનો સામનો કરવો પડે તો? આપણે જે હવા શ્વાસ રૂપે લઈએ છે એ કેટલી શુદ્ધ છે એ આપણને ખબર નથી ઉપરાંત વાતાવરણમાં કેટલાંક અતિશય સૂક્ષ્મ, પણ ભારે નુકસાનકારક તત્ત્વો મોજૂદ છે, જેનાથી આપણે અજાણ છીએ. આપણા (સામાન્ય રીતે શહેરી) વાતાવરણમાં ધૂળ, પરાગરજ, વગેરે કુદરતી તત્ત્વો સાથે હવે કૃત્રિમ બનાવટના અને માનવશરીર માટે અતિ જોખમી સાબિત થાય તેવા માઈક્રોપ્લાસ્ટિક્સના કણ પણ જોવા મળી રહ્યા છે.

સમુદ્રમાં ફેંકવામાં આવતો પ્લાસ્ટિકનો કચરો એમાં વસતા જીવોને કઈ રીતે હાનિ પહોંચાડે છે એ વિશે અભ્યાસ કરતાં બ્રિટનની પ્લાયમાઉથ યુનિવર્સિટીના મરીન ઈકોલૉજિસ્ટ રિચાર્ડ થોમસને નોંધ્યું કે પાણીમાં પ્લાસ્ટિકના કેટલાક સૂક્ષ્મ કણ પણ મોજૂદ છે, જેની અસર સમુદ્રી જીવ પર વધુ ઘાતક હોઈ શકે છે. પ્લાસ્ટિકના આ સૂક્ષ્મ કણ વિશે વધુ માહિતી મેળવી રિચાર્ડ થોમસને ૨૦૦૪માં એનું માઈક્રોપ્લાસ્ટિક્સ તરીકે નામકરણ કર્યું હતું. વૈજ્ઞાનિકોએ પછી તો નોંધ્યું કે માઈક્રોપ્લાસ્ટિક્સ સમુદ્રમાં વસતા સૌથી મોટા જીવ વહેલથી માંડીને સૌથી સૂક્ષ્મ જીવ ઝુપ્લાંકટન સુધી દરેકને અસર કરે છે. હવે તાજેતરમાં થયેલી શોધ મુજબ માઈક્રોપ્લાસ્ટિક્સ આપણા વાતવરણમાં પણ મોજૂદ છે અને માણસોનાં સ્વાસ્થ્ય પર સુદ્ધાં અસર કરે છે.