આવા વૈવાહિક સંબંધને તમે સ્વીકારો છો?

સજાતીય પાત્રોનાં લગ્નને કાનૂની માન્યતા આપવાને લગતો સર્વોચ્ચ અદાલતનો ચુકાદો જે આવે અને જ્યારે આવે, આપણો સમાજ એ માટે તૈયાર છે ખરો?

- હીરેન મહેતા

અમુક ઘટના કે વાત આપણી નજર સામે બનતી હોય, આપણા કાને સતત પડતી હોય તેમ છતાં એવું બને કે આપણે ઝટ એ સ્વીકારી શકીએ નહીં. સજાતીય સંબંધ એવું જ એક સમીકરણ છે જેના કિસ્સા આપણી આસપાસ હશે, આપણે એ વિશે જાણતા સુદ્ધાં હશું, પરંતુ આપણામાંથી મોટા ભાગનાના દિમાગમાં એની ઘડ નહીં બેસે.

આપણા કેટલાક પ્રાચીન ગ્રંથોમાં એના ઉલ્લેખ મળે છે. વર્ષો અગાઉનાં શિલ્પોમાં એવા સંબંધ કાયમ માટે કોતરાઈ ગયા છે, પણ એકવીસમી સદીનું આપણું મન એવાં કૃત્યોને સમાજવિરોધી ગણે છે એટલે બે સ્ત્રી કે બે પુરુષના વૈવાહિક સંબંધને માન્યતા આપવાનું તો હજી આપણે વિચારી પણ શકીએ એમ નથી. આ જ કારણે સર્વોચ્ચ અદાલતમાં સજાતીય (સેમ-સેક્સ) લગ્નને કાનૂની સ્વીકૃતિ આપવાના મામલે ચાલી રહેલા કેસમાં મોટો વિવાદ ખડો થવાની ભારોભાર શક્યતા છે.