દિવ્યાંગોની ક્ષમતાની કસોટી કરતી સ્પર્ધામાં ભાગ લેશે સુરતના ફોટોગ્રાફર

મનહર ચૌહાણઃ પોલિયો છે, પણ ફોટોગ્રાફી તો કરી જ શકું છું ને!

- 

હું  ત્યારે બે વર્ષનો હતો. મને તાવ આવ્યો અને એકાએક પગ જાણે થાંભલામાંથી રબરની ટ્યૂબ બની ગયા હોય એમ હું પડી ગયો. એ પછી ક્યારેય હું સ્થિર ઊભો રહી શક્યો નહીં, કારણ કે પગમાં ૭૦ ટકા વિકલાંગતા સાથે પોલિયો થઈ ચૂક્યો હતો. બાળપણમાં મિત્રો ચીડવતા અને એમની સાથે કોઈ રમતમાં ભાગ લઈ શકતો નહીં. દિવ્યાંગતા જાણે મારા માટે અભિશાપ બની ગઈ..’

વ્યવસાયે ફોટોગ્રાફર એવા વિકલાંગ મનહર ચૌહાણ આ મહિને ફ્રાન્સમાં યોજાનારી ઈન્ટરનૅશનલ એબેલિમ્પિક્સમાં દેશનું પ્રતિનિધિત્વ કરવા જઈ રહ્યા છે ત્યારે એમણે પોતાની બાળપણની વેદના ચિત્રલેખા સમક્ષ આ રીતે રજૂ કરી હતી. એબેલિમ્પિક્સ એ વિવિધ પ્રકારની શારીરિક અક્ષમતા ધરાવતા લોકો માટે એમની કોઈ ને કોઈ કુશળતા દેખાડવા માટે આંતરરાષ્ટ્રીય સ્તરે યોજાતી સ્પર્ધા છે. આ વર્ષે ફ્રાન્સમાં એનું આયોજન થયું છે (૨૩થી ૨૬ માર્ચ) અને એમાં ભારતના ૧૪ પ્રતિનિધિ ભાગ લેવાના છે.