કવિતા પંડ્યા: મહિલા ક્રિકેટરોને બળવાન-જુસ્સાવાન બનાવે છે આ ગુજરાતણ

મુંબઈની આ છોકરી દોડવામાં એટલી નિપુણ થઈ કે એશિયન ગેમ્સ માટે એની પસંદગી થઈ, પણ બીમારીને કારણે એની કરિયર ફંટાઈ ગઈ. હવે પંદરેક વરસથી સ્ટ્રેન્થ અને કન્ડિશનિંગ કોચ તરીકે એ ભારતીય મહિલા ક્રિકેટરોને ચુસ્ત-સ્ફૂર્તિલા બનાવે છે.

- દિવ્યાશા દોશી

હાલમાં જ ભારતની અન્ડર-૧૯ મહિલા ક્રિકેટ ટીમે ટી-૨૦ વર્લ્ડ કપમાં ઈંગ્લૅન્ડને હરાવીને વિક્રમી જીત મેળવી. ભારતની અન્ડર-૧૯ ટીમની આ પ્રથમ સ્પર્ધા હતી. અરે, અત્યાર સુધી એમને આંતરરાષ્ટ્રીય મૅચ રમવા જ નહોતી મળી. હવે સિનિયર મહિલા ક્રિકેટ ટીમ વર્લ્ડ કપમાં ભાગ લેવા સાઉથ આફ્રિકા પહોંચી છે એમાં અન્ડર-૧૯ની બે ખેલાડી શેફાલી વર્મા તથા રિચા ઘોષ (વિકેટ કીપર)ને લેવામાં આવી છે.

વિજેતા ટીમના ખેલાડી અને કોચને લોકો ઓળખે છે, પણ રમતવીરોને ફિટનેસની તાલીમ આપતા પ્રશિક્ષક બહુ પ્રસિદ્ધિમાં આવતા નથી. આપણા માટે ગર્વની વાત છે કે અન્ડર-૧૯ ટીમના સિલેક્શન પહેલાં થતી ખેલાડીઓની ટ્રેનિંગ તેમ જ સિનિયર મહિલા ખેલાડીઓને સ્ટ્રેન્થ અને કન્ડિશનિંગ કોચ તરીકે તાલીમ આપનાર એક ગુજરાતણ કવિતા પંડ્યા છે.

કવિતા પંડ્યા પ્રિયદર્શિનીને કહે છે: ‘આપણે ત્યાં ક્રિકેટમાં અગાઉ ફિટનેસ કરતાં પરફોર્મન્સને વધુ મહત્ત્વ અપાતું હતું, પણ વિરાટ કોહલીએ સાબિત કર્યું કે સ્ટ્રેન્થ અને કન્ડિશનિંગ અર્થા શારીરિક બળ, સ્ફૂર્તિ અને ચપળતા સતત સારા પરફોર્મન્સ માટે અત્યંત આવશ્યક છે. હાલમાં જ મહિલા વર્લ્ડ કપ પહેલાં સાઉથ આફ્રિકન ઑલરાઉન્ડર ડેન વેન નિકેર્કને વર્લ્ડ કપ ટીમમાં લેવામાં ન આવી, કારણ કે ફિટનેસ ટેસ્ટમાં એ નાપાસ થઈ. યાદ રહે, ડેન વેન એટલી સફળ ખેલાડી છે કે ટીમમાં હોત તો એને કદાચ કપ્તાનપદ મળ્યું હોત.’