પુત્રને શ્રદ્ધાંજલિ આપવા તબીબ પિતા શું શીખ્યા?

અમદાવાદના ૭૨ વર્ષના ડૉ. રમણ પટેલ તો આ ઉંમરે રોબોટિક સર્જરી પણ કરે છે.

- 

ડૉ. રમણ પટેલ: જુવાનજોધ પુત્રની ચાદ કાયમ રાખવા..

આપણે ત્યાં ઘણા લોકો સદ્ગત સ્વજનની સ્મૃતિ અવનવી રીતે જાળવે છે. બહુધા લોકો સદ્ગતની પુણ્યતિથિએ ગરીબોને દાન-પુણ્ય કરે અથવા ધાર્મિક, સેવાભાવી સંસ્થા કે વૃદ્ધાશ્રમમાં તિથિદાન લખાવે તો કોઈક સદ્ગતની સ્મૃતિ ચિરંજીવ બને એવાં કાર્ય કરે.

થોડા સમય પહેલાં સુરતના એક યુવકે એના પુસ્તકપ્રેમી પિતાની સ્મૃતિમાં લાઈબ્રેરી ખોલી. એથી હટકે કહેવાય એવું કાર્ય અમદાવાદના સિનિયર ગાયનેકોલોજિસ્ટ અને આઈવીએફ નિષ્ણાત ડૉ. રમણ પટેલે કર્યું. યુવાવયે મૃત્યુ પામેલા તબીબ પુત્રની યાદ તાજી રાખવા એ એન્ડોસ્કોપી શીખ્યા અને હમણાં તો એથીય આગળ જઈ રોબોટિક સર્જરી કરતાં પણ શીખ્યા! 

એમનો જન્મ ૧૯૫૧માં અમદાવાદ જિલ્લાના ચુંવાળ ડાંગરવા ગામમાં કડવા પાટીદાર પરિવારમાં. માતા શારદાબહેન ગૃહિણી અને પિતા શાંતિલાલ પટેલ ઑઈલ મિલમાલિક.

રમણે ઘરઆંગણે પ્રાથમિક શિક્ષણ લીધું. પછી ૧૯૭૮માં અમદાવાદની બી.જે. મેડિકલ કૉલેજમાંથી એમડી થઈને બીજા વર્ષે મહેસાણામાં ગાયનેકોલોજિસ્ટ તરીકે શારદા હૉસ્પિટલ શરૂ કરી. અભ્યાસ દરમિયાન જ એમનાં લગ્ન થયાં. એમને ત્યાં ૧૯૭૭માં ઉત્તરાયણના દિવસે પુત્ર ઋજુલ અને ત્રણેક વર્ષ બાદ પુત્રી કિંજલ જન્મી.