રસ્તો બદલાશે, લોકસેવાના ઈરાદાનો મુકામ એ જ રહેશેઃ રિવાબા

સ્ટાર ક્રિકેટર રવીન્દ્ર જાડેજાનાં પત્નીને ભાજપે ઉમેદવાર તરીકે પસંદ કરતાં જામનગરની વિધાનસભા બેઠક તરફ બધાનું ધ્યાન ખેંચાયું છે. સામે બબ્બે સક્ષમ ઉમેદવારો છે, જેમનું પત્તું કપાયું એ ધારાસભ્ય હકુભા જાડેજાની નારાજગી છે અને ઘરમાં જ સગાં નણંદબા છે, જે કોંગ્રેસનાં પ્રચારપ્રમુખ છે. જો કે રિવાબા પોતાની જીત માટે વિશ્વાસ ધરાવે છે.

- મુલાકાતઃ દેવેન્દ્ર જાની (જામનગર)

ગૃહપ્રધાન અમિત શાહ સાથે: મને ભાજપનો અભિગમ ગમ્યો એટલે..

ગુજરાતના જામનગર (ઉત્તર)ની બેઠક પર ભાજપના સેલિબ્રિટી ઉમેદવાર સામે એમનાં જ સગાં નણંદ ચૂંટણીપ્રચારનું મેદાન ગજાવી રહ્યાં હોવાથી સૌકોઈની નજર છે. વાત છે રિવાબા જાડેજાની. રાજકારણનો રંગ ઘરના ઉંબરા સુધી પહોંચ્યો છે કે નહીં? રાજકારણમાં આવવાનું કેમ પસંદ કર્યું? આવા અનેક સવાલના નિખાલસ જવાબ રિવાબાએ ચૂંટણીપ્રચારની વ્યસ્તતા વચ્ચે ચિત્રલેખાને એક ખાસ મુલાકાતમાં આપ્યા છે.

જામનગરના પૉશ એરિયા પંચવટી સોસાયટીમાં એક આલીશાન બંગલાની સામે અમે પહોંચ્યા. ચૂંટણીના ઘોંઘાટ વચ્ચે બપોરે અહીં વાતાવરણ શાંત હતું. બંગલા પર કોઈ પક્ષનાં બૅનર, ધ્વજ એવું કશું જ જોવા ન મળ્યું. આમ તો કોઈ મોટા રાજકીય પક્ષના ઉમેદવારનું આ ઘર હોય એવું લાગે જ નહીં. વેલ, અમે બંગલામાં પ્રવેશ કર્યો.

‘બાપુ છે ઘરે?’ એવા સવાલ સામે ‘એક મિનિટ ઊભા રહો..' એવો જવાબ વાળી દરવાજે ઊભેલા એક યુવાને કોઈની સાથે વાત કરી કહ્યું: ‘હા, છે. આવો અંદર..’ એ યુવાન સમજી ગયો હતો કે અમે જાડેજાબાપુને નહીં, પણ બાને મળવા આવ્યા છીએ! પાંચેક મિનિટ બાદ એ યુવાન અમે જેમને મળવા માગતા હતા એ રિવાબા જાડેજા બેઠાં હતાં ત્યાં અમને દોરી ગયો.

‘જય માતાજી..’ સાથે અમારી મુલાકાત શરૂ થઈ. વચ્ચે વચ્ચે રિવાબાનો ફોન રણકતો રહ્યો. એમને એક ચૂંટણીસભામાં જવાનું હતું, પણ ચિત્રલેખાના તમામ સવાલના જવાબ સહેજ પણ ઉતાવળ વિના એમણે આપ્યા.