સારમાં સમાય આખી વાર્તા..

કવિતાનો સાર સમજાવો.. એવું શિક્ષક કહેતા ત્યારે વિદ્યાર્થીજીવનમાં ડર લાગતો. ઘણી વાર તો કવિને પોતાને જ સાર ન સમજાતો હોય ત્યાં વાચકનો શું વાંક?

- હિતેન આનંદપરા

પહેલેથી છેલ્લે લગ વાત કરે છે કોઈ

કોઈ કથા કહેવાને બદલે સાર કહે છે.

                                                  - ભરત વિંઝુડા

કેટલીક જિંદગી નવલકથા જેવી હોય, એને નિરૂપવા ખાસ્સું મોટું ફ્લક જોઈએ. કેટલીક ટૂંકી વાર્તા જેવી હોય, આઠ-દસ પાનાંમાં બધું આવરી લેવાય તો કેટલીક જિંદગી તો ગઝલ જેવી હોય, પાંચ-સાત શેરમાં જ બધું કહેવાઈ જાય. ફલક કોઈ પણ હોય, આખરે તો ફળશ્રુતિ જ જોવાની હોય છે.

સામાન્ય રીતે માંડીને વાત કહેવાની આપણને આદત હોય છે. કેટલીક વાર પૂર્વભૂમિકા એટલી ખેંચાય કે મૂળ મુદ્દાની ઉત્તરક્રિયા થઈ જાય. સાર પામવો તો સહેલો નથી જ, પણ સાર સુધી પહોંચવાની પ્રક્રિયા પણ નિષ્ઠા માગી લે છે.