મચ્છુ તારાં પાણી વેરીલાં કેમ?

હજી તો દિવાળીના દિવસો પૂરા થયા નહોતા, બજારો પણ પૂરી ખૂલી નહોતી અને મયૂરી નગરી મોરબીમાં ઘરના ટોડલે આસોપાલવનાં તોરણ પણ હજી ઝૂલતાં હતાં ત્યાં મચ્છુ નદી પરના ઝૂલતા પુલે મોતનું તાંડવ ખેલ્યું અને પલકવારમાં આખું નગર હીબકે ચડ્યું. કોણ જાણે મોરબીને કોની નજર લાગી છે કે પછી મચ્છુનાં પાણી સાથે લેણાદેણી નથી? નવી આશા-અરમાનો સાથે મોરબીવાસીઓ નવલા વર્ષનો આરંભ કરે એ જાણે કુદરતને મંજૂર ન હોય એમ મોતનો માતમ છવાઈ ગયો. મોરબીની ગલીએ ગલીએ બસ, એક જ સવાલ પુછાઈ રહ્યો છે કે મચ્છુ હજી કેટલાનો ભોગ લેશે?

- દેવેન્દ્ર જાની (મોરબી)

‘આ સાંજ ગોઝારી હશે કોને ખબર? મચ્છુ હજુય ભૂખી હશે કોને ખબર? સલૂણી સંધ્યા કાળજું કંપાવી ગઈ, ઢળતી સાંજ છેલ્લી હશે કોને ખબર?’

મોરબી, મચ્છુ અને માતમ.. ૪૩ વર્ષ બાદ ફરી એક વાર જાણે એ કાળમુખો ઈતિહાસ દોહરાયો. રવિવાર અને છઠપૂજાનો દિવસ હતો. લોકો હજી તહેવારના મૂડમાં હતા. મોરબીમાં ઝૂલતો પુલ ફરવા જવા માટેનું એક જાણીતું સ્થળ હોવાથી સેંકડો લોકો બાળકોને લઈને પુલ પર પહોંચી ગયા, પણ એમને ક્યાં ખબર હતી કે આ ઝૂલતો પુલ એ જિંદગીની આખરી સફર બની જશે.

ફરી એક વાર મચ્છુનાં પાણીએ અનેક પરિવારોનો માળો વેરવિખેર કરી નાખ્યો. આંખના પલકારામાં અનેક જિંદગી મચ્છુનાં પાણીમાં હોમાઈ ગઈ. માત્ર ત્રણ સેકન્ડમાં પુલ તૂટવાની સાથે અનેક લોકો મચ્છુ નદીનાં ઊંડાં પાણીમાં પડ્યા. મંગળવાર, ૧ નવેમ્બરે આ લખાય છે ત્યાં સુધીમાં સત્તાવાર આંક મુજબ ૧૩૫ લોકો મોતને ભેટ્યા છે. ૩૦ ઑક્ટોબરની સાંજે ૬:૩૦ની આસપાસ બનેલી કરુણાંતિકાથી માત્ર મોરબી જ નહીં, આખું ગુજરાત શોકમાં ડૂબ્યું છે. વિધાનસભાની ચૂંટણીના એલાનની રાહ જોતું ગુજરાત મોરબીથી આવેલા માઠા સમાચારથી સ્તબ્ધ થઈ ગયું. કાળજું કંપાવી દેતી મોરબીની આ દુર્ઘટનાએ ૧૧ ઓગસ્ટ, ૧૯૭૯ની જળ હોનારતની યાદ તાજી કરી દીધી જ્યારે મચ્છુ ડેમ તૂટતાં સેંકડો લોકોનો ભોગ લેવાયો હતો.

રવિવારે સાંજે છઠપૂજા નિમિત્તે દેશમાં લાખો લોકો જળની સાક્ષીએ સૂરજની પૂજા કરી રહ્યા હતા ત્યારે મોરબીમાં ઝૂલતો પુલ તૂટતાં અનેક લોકો મચ્છુ નદીનાં પાણીમાં પડીને મૃત્યુ પામ્યા. મૃતકોમાં બાળકોની સંખ્યા વધુ હતી.