સારાન્વેષ

એ.આઈ. કંપનીઓનો પરપોટો ફૂટવામાં છે?

- સ્પર્શ હાર્દિક

એકડા પાછળ બાર શૂન્યો ગોઠવીએ તો ટ્રિલિયનનો આંકડો બને છે. નાનાં-મોટાં રાષ્ટ્રોનું કુલ ઘરેલુ ઉત્પાદન યાને જીડીપીનું મૂલ્ય ટ્રિલિયનમાં માપવામાં આવે છે. થોડાં સપ્તાહો અગાઉ વૈશ્વિક વ્યાપારમાં એક અભૂતપૂર્વ ઘટનાએ આકાર લીધો હતો. આશરે ૩૬,૦૦૦ કર્મચારીઓ ધરાવતી સેમિકન્ડક્ટર ક્ષેત્રની Nvidia(એનવીડિયા) સંસારની એવી પ્રથમ લિસ્ટેડ કંપની બની, જેનું માર્કેટ કૅપિટલાઇઝેશન પાંચ ટ્રિલિયન યુએસ ડૉલર્સને આંબી ગયું. આ આંકડો વિશ્વની ટોચની ત્રીસ ધનાઢ્ય વ્યક્તિઓની કુલ સંપત્તિના કરતાં વધારે છે તથા અંદાજે ૯૭% દેશોની વાર્ષિક જીડીપી કરતાં પણ અધિક છે. ૨૦૨૪માં જર્મનીની જીડીપી અંદાજે ૪.૬ ટ્રિલિયન ડૉલર્સ હતી. અલબત્ત, Nvidiaનું માર્કેટ કૅપિટલાઇઝેશન કંપનીનું સમગ્ર મૂલ્ય દર્શાવે છે, જ્યારે અહીં જે-તે રાષ્ટ્રના ફક્ત વાર્ષિક ઘરેલુ ઉત્પાદન સાથે એની સરખામણી કરવામાં આવી છે. અનેક રાષ્ટ્રોનું પોતાનું સમગ્ર મૂલ્ય કોઈ પણ જાયન્ટ કંપની કરતાં અનેકગણું વધારે જ હોવાનું. તેમ છતાં આ આંકડાઓ વાંચીને અંદાજો લગાવી શકાય કે Nvidia કેટલી વિશાળ કંપની બની ચૂકી છે.

ઇંગ્લિશમાં ‘ગોલ્ડ રશ' શબ્દ છે, યાને એકાએક ક્યાંકથી સોનાનો ભંડાર મળી આવે ત્યારે લોકોનો ત્યાં થતો ધસારો. એવો એક બોધપાઠ છે કે ગોલ્ડ રશ દરમિયાન શાણો માણસ પાવડા વેચવાનો ધંધો શરૂ કરે, કારણ કે સોનાના લોભમાં દરેક વ્યક્તિ ખોદવા માટે પાવડો તો ખરીદવાની જ! એ . આઈ .ના ગોલ્ડ રશમાં Nvidia જેવી કાનીઓ જાણે કે પાવડા વેચવાનું કામ thes કરી રહી છે. એ.આઈ. ક્રાંતિના પાયામાં મુખ્યત્વે જે હાર્ડવેર રહેલું છે, એ ગ્રાફિક્સ પ્રૉસેસિંગ યુનિટ યાને જીપીયુ અને અન્ય પ્રકારની ચિપ ડિઝાઇન તથા ડૅવલપ કરતી એક અગ્રેસર કંપની છે Nvidia. એ.આઈ.નો પ્રાણ જે દેહમાં વસેલો છે, એવા આ જીપીયુ ડેટા સેન્ટર ચલાવવા માટે પણ ઉપયોગી છે. અમેરિકન ટૅક કંપનીઓએ વિકસાવેલા આવાં ઍડવાન્સ જીપીયુનું ઉત્પાદન ઘણુંખરું TSMC (તાઇવાન સેમિકન્ડક્ટર મેન્યુફેક્ચરિંગ કંપની) કરે છે. ચીનનો ડોળો તાઇવાન પર હોવાથી આ કંપનીને કારણે પણ ભવિષ્યમાં ચીન અને અમેરિકા વચ્ચે યુદ્ધની સ્થિતિ સર્જાઈ શકે છે, કારણ કે TSMC જેવી ઉચ્ચ ગુણવત્તાની ચિપ મેન્યુફેક્ચરિંગ કંપનીનો કોઈ વિકલ્પ અત્યારે તો હાજર નથી.