അധിക ഭൂമിക്കും കിട്ടും അവകാശം

സാധാരണക്കാരെ ബാധിക്കുന്ന 3 ബില്ലുകൾ ഉടനെ നിയമമാകുന്നു.

- ബാലകൃഷ്ണൻ തൃക്കങ്ങോട്

രേഖയിലുള്ളതിനെക്കാൾ ഭൂമി കൈവശമുള്ളവർക്ക് ഇനി സന്തോഷിക്കാം. സ്വകാര്യ വ്യക്തികളുടെ കൈവശമുള്ള അധിക ഭൂമി തർക്കങ്ങളില്ലെങ്കിൽ ക്രമവൽക്കരിക്കുന്നതിനുള്ള സുപ്രധാന നിയമം വരുന്നു. നിലവിലെ റവന്യു രേഖയിലുള്ളതിലും അധികം ഭൂമി ഡിജിറ്റൽ സർവേപ്രകാരം കണ്ടെത്തുകയും മറ്റു തർക്കങ്ങൾ ഇല്ലാതിരിക്കുകയും ചെയ്താൽ ആ ഭൂമിക്കു കൂടി കൈവശരേഖ നൽകും. ഇതിനായി അധിക ഭൂമി ക്രമവൽക്കരണബിൽ നിയമമാക്കുകയാണ് സംസ്ഥാന സർക്കാർ.

സർക്കാരിന്റേതല്ലാത്തതും വ്യവഹാരങ്ങളിൽ പെടാത്തതുമായ ഭൂമിക്കാണ് നിയമം ബാധകമാകുന്നത്. ക്രമവൽക്കരണം അനുവദിക്കുന്ന ഭൂമിക്കു പരിധി നിശ്ചയിക്കും. ഫീസിന്റെ കാര്യത്തിലും വ്യവസ്ഥകൾ കൊണ്ടു വരും. അധിക ഭൂമി സർക്കാർ ഭൂമിയോടു ചേർന്നാകരുത്, പട്ടയഭൂമിയാകരുത്. കൃത്യമായ അതിർത്തിയുണ്ടാകണം തുടങ്ങിയ വ്യവസ്ഥകളും ഉണ്ടായിരിക്കും.