ഹെൽത്ത് കവറേജ് എത്ര വേണം?

ആരോഗ്യ ഇൻഷുറൻസിനും വേണം ചെക്കപ്പ്

- 

ആരോഗ്യ ഇൻഷുറൻസ് അനിവാര്യമാണ് എന്ന ബോധം ഇന്നു മിക്കവർക്കുമുണ്ട്. എന്നാൽ എനിക്ക് എത്ര കവറേജ് വേണം എന്നതാണ് സംശയം. ആവശ്യത്തിനു കവറേജ് ഉറപ്പാക്കാൻ നിങ്ങളുടെ പ്രായം, ലൈഫ്സ്റ്റൈൽ, ആരോഗ്യ സ്ഥിതി, നേരിടുന്ന റിസ്കുകൾ, ഭാവിയിലെ സാഹചര്യം എന്നിവയെല്ലാം വിലയിരുത്തണം. കുടുംബനാഥന്റെ വാർഷിക വരുമാനത്തിന്റെ 50% കവറേജാണ് ആരോഗ്യ ഇൻഷുറൻസിന്റെ അടിസ്ഥാന ചട്ടം എന്ന് വിദഗ്ധർ പറയുന്നു. അതായത് 10 ലക്ഷം രൂപ വാർഷിക വരുമാനമുള്ളയാൾ നാലംഗകുടുംബത്തിന് കുറഞ്ഞത് അഞ്ചു ലക്ഷത്തിന്റെ കവറേജ് എടുക്കണം. അംഗങ്ങളുടെ എണ്ണം, പ്രായം എന്നിവയനുസരിച്ച് ഇതു വ്യത്യാസപ്പെടും. എന്തായാലും സാധാരണക്കാരെ സംബന്ധിച്ചു നാലംഗ കുടുംബത്തിന് ഏറ്റവും കുറഞ്ഞത് അഞ്ചു ലക്ഷത്തിന്റെ കവറേജ് ഉറപ്പാക്കുക. ക്രമേണ അതു കൂട്ടിക്കൊണ്ടുവരുക എന്നതാണ് വിദഗ്ധർ നൽകുന്ന നിർദേശം.

പ്രായം ചെറുപ്പക്കാർക്കു പ്രീമിയം കുറവായിരിക്കും. തുടക്കത്തിൽ കുറഞ്ഞ തുകയ്ക്ക് ഇൻഷ്വർ ചെയ്തിട്ട് പ്രായം കൂടുന്നതനുസരിച്ച് കവറേജ് ഉയർത്താം.

ലൊക്കേഷൻ മെട്രോപൊളിറ്റൻ സിറ്റികളിൽ ചികിത്സാച്ചെലവു കൂടും. അതിനാൽ ചെറുപട്ടണങ്ങളെക്കാൾ കവറേജ് വേണ്ടിവരും.

ലൈഫ്സ്റ്റൈൽ പുകവലി, മദ്യപാനം, മുറുക്ക് തുടങ്ങിയവയുള്ളവർക്കു രോഗസാധ്യത കൂടുതലാണ്. അവർ കൂടുതൽ തുക പ്രീമിയം നൽകണം.

മദ്യപാനം മൂലമുള്ള പല രോഗങ്ങൾക്കും കമ്പനികൾ ക്ലെയിം നിഷേധിക്കാറുണ്ട്. മദ്യപാന ശീലത്തെക്കുറിച്ചു പോളിസി വാങ്ങുമ്പോൾ വെളിപ്പെടുത്തിയിട്ടില്ലെങ്കിൽ ക്ലെയിം നൽകാൻ കമ്പനിക്കു ബാധ്യതയില്ലെന്ന് സുപ്രീംകോടതി ഈയിടെ വ്യക്തമാക്കിയിട്ടുണ്ട്.

ചെലവു കുതിക്കുന്നു; പോര 5 ലക്ഷം