ഒളിഞ്ഞിരിക്കുന്നത് പലതരം ചതിക്കുഴികൾ

ആരോഗ്യ ഇൻഷുറൻസിനും വേണം ചെക്കപ്പ്

- 

അഞ്ചു ലക്ഷത്തിന്റെ ഹെൽത്ത് പോളിസിയു ള്ള എഴുപതുകാരൻ ഈയിടെ ഹൃദയചികിത്സ നടത്തി. എട്ടു ലക്ഷം രൂപ ചെലവായെങ്കിലും അഞ്ചു ലക്ഷം തിരിച്ചുകിട്ടുമല്ലോ എന്നതായിരുന്നു ആശ്വാസം. പക്ഷേ, കിട്ടിയത് 3.5 ലക്ഷം മാത്രം.

മുതിർന്ന പൗരന് സം അഷർഡിന്റെ 30 ശതമാനത്തിനേ അർഹതയുള്ളൂ എന്നാണ് കമ്പനിയുടെ വിശദീകരണം. പിന്നീടാണ് പോളിസി രേഖകളെടുത്തു പരിശോധിച്ചത്. വളരെ ചെറിയ അക്ഷര ത്തിൽ സീനിയർ സിറ്റിസൺസിന് പ്രധാന ശസ്ത്രക്രിയകൾക്കു ക്ലെയിമിന്റെ 70 ശതമാനമേ ലഭിക്കൂ എന്ന് അതിൽ എഴുതിയിട്ടുണ്ട്.

ജോസഫ് ഈയിടെ കാൻസർ ചികിത്സാർഥം അഡ്മിറ്റായി. 12 ലക്ഷം രൂപ കവറേജുള്ളതിനാൽ ആശങ്കയില്ലായിരുന്നു. പക്ഷേ, നാലു ലക്ഷം രൂപ ആദ്യം അടച്ചാലേ ബിൽ ക്ലെയിം ചെയ്യാനാകൂ എന്നറിഞ്ഞപ്പോൾ ഞെട്ടിപ്പോയി. നാലു ലക്ഷം രൂപ ഡിഡക്ടബിളായ പോളിസിയാണ് എടുത്തിരിക്കുന്നത്. ചെലവായ 2.5 ലക്ഷം രൂപയും കയ്യിൽനിന്ന് അടച്ചു. ഒരു പൈസപോലും റീ ഇമ്പേഴ്സ്മെന്റായിപ്പോലും കിട്ടിയില്ല.

ഡിഡക്ടബിൾ എന്നതു വലിയ ചതിക്കുഴിയാണ്. പൊതുവേ ടോപ് അപ് പ്ലാനുകളിലാണ് ഇതു സം ഭവിക്കുക. നിശ്ചിത തുകയ്ക്ക് ബേസിക് കവറേജുള്ളവർക്ക് അധിക കവറേജിനായി എടുക്കാവുന്നവയാണ് ടോപ് അപ് പ്ലാൻ. പക്ഷേ, ഇതു മനസ്സിലാക്കാതെ കുറഞ്ഞ തുകയ്ക്കു വലിയ കവറേജ് എന്നു കാണുമ്പോൾ ഓടിച്ചെന്ന് ടോപ് അപ് പോളിസി വാങ്ങുന്നവർ കെണിയിൽ വീഴും. പോളിസിയെക്കുറിച്ചു മനോഹരമായി വിശദീകരിച്ച ഏജന്റോ ശാഖയിലെ ഉദ്യോഗസ്ഥനോ ഇതേക്കുറിച്ച് ഒരക്ഷരം പോലും മിണ്ടിയില്ല.

പിതാവിനായാണ് ശരൺ പോളിസി അന്വേഷിച്ചത്. മെഡിക്കൽ ചെക്കപ്പ് ഒന്നും ഇല്ലാതെ സെൽഫ് ഡിക്ലറേഷന്റെ പുറത്ത് പ്രമുഖ കമ്പനിയുടെ പോളിസി ലഭിച്ചപ്പോൾ സന്തോഷിച്ചു. പക്ഷേ, നാലു വർഷങ്ങൾക്കിപ്പുറം ചികിത്സ തേടിയപ്പോൾ കമ്പനി ക്യാഷ്‌ലെസ്സ് നിരസിച്ചു. എങ്കിലും റീ ഇമ്പേഴ്സ്മെന്റ് കിട്ടുമല്ലോ എന്ന ആശ്വാസത്തിൽ രേഖകളെല്ലാം സമർപ്പിച്ച് കാത്തിരിപ്പു തുടങ്ങിയിട്ടു മാസങ്ങളായി. ഔദ്യോഗികമായി അറിയിപ്പൊന്നും ലഭിച്ചിട്ടില്ല.