എസ്ക്രോ ഉണ്ടോ? പേടിക്കാതെ, വഞ്ചിക്കപ്പെടാതെ നടത്താം റിയൽ എസ്റ്റേറ്റ് ഇടപാടുകൾ

വലിയ തുകയുടെ കൈമാറ്റങ്ങളിൽ സുരക്ഷ ഉറപ്പു നൽകുന്ന എസ്ക്രോ അക്കൗണ്ടിന് ഇടപാടു തുകയുടെ 0.10% മുതൽ 2% വരെ ഫീസായി ഈടാക്കും

- സുമ സണ്ണി

ഒരു വർഷംകൊണ്ടു പണിതീർത്തു കൈമാറാം എന്ന വ്യവസ്ഥയിലാകും വീടിനായി നിങ്ങൾ റിയൽ എസ്റ്റേറ്റ് കമ്പനിക്കു പണം നൽകുന്നത്. എന്നാൽ പല പ്രോജക്ടുകളും 5 വർഷമൊക്കെ വൈകാറുണ്ട്. അതുവഴി പലരും കടക്കെണിയിൽപെടുന്ന അനുഭവങ്ങൾ സോഷ്യൽ മീഡിയയിൽ വായിക്കാം. കാരണം പുതിയ വീടിന്റെ വായ്പാ തിരിച്ചടവും താമസിക്കുന്ന വീടിന്റെ വാടക കൊടുക്കലും ഒരേ സമയം ചെയ്യുമ്പോഴുള്ള ഇരട്ടി ബാധ്യത ആർക്കും താങ്ങാനാകില്ല.

ഇത്തരം പ്രശ്ങ്ങൾക്കു കൃത്യമായ പരിഹാരം തേടൽ ബുദ്ധിമുട്ടാണ്. എന്നാൽ അറിയുക, കയ്യാങ്കളിയോ വാക്കേറ്റമോ ഇല്ലാതെ പ്രശ്നങ്ങൾ കൈകാര്യം ചെയ്യാൻ സഹായകമായ ഒരു സംവിധാനമുണ്ട്. പണമിടപാടുകൾ എസ്ക്രോ അക്കൗണ്ടിലൂടെ നടത്തുക എന്നതാണ് അത്.

എന്താണ് എസ്ക്രോ?

രണ്ടു കക്ഷികൾ തമ്മിലുള്ള പണമിടപാടുകളിലെ പ്രശ്ങ്ങൾ ഒഴിവാക്കാൻ മൂന്നാമതൊരാൾ സഹായവുമായി എത്തിയാലോ? അതാണ് എസ്ക്രോ അക്കൗണ്ടിന്റെ ദൗത്യം എന്നു ലളിതമായി പറയാം. പണം കൈമാറ്റത്തിലെ തർക്കങ്ങൾ ഒഴിവാക്കാൻ എസ്ക്രോ നിങ്ങളെ സഹായിക്കും.