വരുമോ ആന്ധ്രാ മോഡലിൽ ഉറപ്പുള്ള പെൻഷൻ?

കൂടുതൽ ആനുകൂല്യങ്ങളോടെ പങ്കാളിത്ത പെൻഷൻപദ്ധതി പരിഷ്കരിക്കുമെന്ന കേന്ദ്രഗവൺമെന്റ് പ്രഖ്യാപനം കേന്ദ്ര-സംസ്ഥാന സർക്കാർ ജീവനക്കാർക്കു വലിയ പ്രതീക്ഷ പകരുന്നു.

- ബാലകൃഷ്ണൻ തക്കങ്ങോട്

മോദി ഗാരന്റി പങ്കാളിത്ത പെൻഷൻ പദ്ധതിയിലും ഉണ്ടാകുമെന്ന പ്രത്യാശയിലാണ് എൻപിഎസിൽ ഉൾപ്പെട്ട കേന്ദ്ര-സംസ്ഥാന സർക്കാർ ജീവനക്കാർ, പാർലമെന്റ് തിരഞ്ഞെടുപ്പിനു മുൻപേ ജീവനക്കാർക്ക് ഉറപ്പുള്ള പെൻഷൻ പദ്ധതി പ്രഖ്യാപിക്കുമെന്ന അഭ്യൂഹം ഉണ്ടായിരുന്നു. എന്നാൽ, പങ്കാളിത്ത പെൻഷനെക്കുറിച്ചു പഠിച്ച് റിപ്പോർട്ട് സമർപ്പിക്കാൻ കേന്ദ്രസർക്കാർ നിയോഗിച്ച ടി.വി.സോമനാഥൻ സമിതി ശുപാർശകൾ സമർപ്പിച്ചപ്പോഴേക്കും തിരഞ്ഞെടുപ്പു നടപടികൾ ആരംഭിച്ചിരുന്നു. ഇപ്പോളിതാ, ഇതിലെ ഗാരന്റീഡ് പെൻഷൻ ശുപാർശ അംഗീകരിക്കാനുള്ള ആലോചനയിലാണ് കേന്ദ്രസർക്കാർ. ഉടൻ അവതരിപ്പിക്കുന്ന കേന്ദ്രബജറ്റിൽ പ്രഖ്യാപനം ഉണ്ടാകുമെന്നും ഉന്നതവൃത്തങ്ങൾ സൂചിപ്പിക്കുന്നു.

ഇനിയൊരു തിരിച്ചുപോക്കില്ല

പഴയ പെൻഷൻ പദ്ധതിയിലേക്കു തിരിച്ചുപോകാതെ എൻപിഎസ് ആനുകൂല്യങ്ങൾ വർധിപ്പിക്കാനാണ് 2023 മാർച്ചിൽ സോമനാഥൻ കമ്മിഷനെ ചുമതലപ്പെടുത്തിയത്. 50% പെൻഷൻ ഉറപ്പാക്കുന്ന പരിഷ്കരണത്തിനാണ് ശുപാർശയെന്നറിയുന്നു. ആന്ധ്രാ സർക്കാർ നടപ്പിലാക്കിയ ഉറപ്പായ പെൻഷൻ പദ്ധതിയുടെ മാതൃകയാണു സ്വീകരിച്ചിരിക്കുന്നത്. ജീവനക്കാരുടെ ദീർഘകാലമായുള്ള ആവശ്യവും ഇതുതന്നെയായിരുന്നു. ചില സംസ്ഥാന ഉപതിരഞ്ഞെടുപ്പുകളിലും കേന്ദ്ര തിരഞ്ഞെടുപ്പിലും ഭരണകക്ഷിക്കു നേരിട്ട തിരിച്ചടിയും മാറിചിന്തിക്കാൻ സർക്കാരിനു പ്രേരകമായിട്ടുണ്ട്.

ആന്വിറ്റികളിലെ നേട്ടം തുച്ഛം

കുറഞ്ഞ സേവനകാലം മാത്രമുള്ളവർക്ക് എൻപിഎസിലെ ആന്വിറ്റികളിൽനിന്നു കിട്ടുന്ന പെൻഷൻ തുച്ഛമാണ്. വയസ്സുകാലത്തു നിത്യ ച്ചെലവിനുപോലും തികയില്ലെന്നത് പദ്ധതിയോടുള്ള കടുത്ത എതിർപ്പിനും കാരണമായി. ഇതേത്തുടർന്ന് പ്രതിപക്ഷം ഭരിക്കുന്ന ചില സംസ്ഥാനങ്ങൾ പഴയതിലേക്കു തിരിച്ചുപോക്കും നടത്തി.

എന്താണ് ആന്ധ്രാമോഡൽ

സേവനവർഷവും അതിനിടയിലുള്ള പിൻവലിക്കലുകളും പരിഗണിച്ച് അവസാനം വാങ്ങിയ ശമ്പളത്തിന്റെ 40-50% വരെ പെൻഷൻ നൽകുന്നതാണ് ആന്ധ്രാപ്രദേശ് ഗാരന്റീഡ് പെൻഷൻ സിസ്റ്റം (APGPS). ജീവനക്കാരന്റെ കാലശേഷം പങ്കാളിക്ക് ഗാരന്റീഡ് തുകയുടെ 60% പെൻഷൻ നൽകും.