കുടംനനയിൽനിന്ന് ഫോൺനനയിലേക്ക് നനയിൽ വന്ന മാറ്റങ്ങൾ

കാർഷികരംഗത്ത് വിത്തു മുതൽ വിപണി വരെ സംഭവിക്കുന്ന മാറ്റങ്ങൾ അവതരിപ്പിക്കുന്ന പംക്തി

- പ്രമോദ് മാധവൻ അസി. ഡയറക്ടർ, കൃഷിവകുപ്പ് ഫോൺ: 9496769074

കേരളത്തിൽ 8 ലക്ഷം ഹെക്ടറോളം സ്ഥലം നെൽ വയലും ചതുപ്പുമായി കിടന്ന കാലത്ത് ഭൂഗർഭത്തിലേക്ക് വലിയ അളവിൽ വെള്ളം കിനിഞ്ഞിറങ്ങുമായിരുന്നു. തെങ്ങുകൾക്ക് എല്ലാ വർഷവും എടുക്കുന്ന തടങ്ങളിലൂടെയും വെള്ളം ഭൂഗർഭത്തിൽ എത്തുമായിരുന്നു. എന്നാൽ, ഇന്ന് പാടങ്ങളും ചതുപ്പുകളും എല്ലാം കൂടി 2 ലക്ഷം ഹെക്ടർ മാത്രം. അതേസമയം വെള്ളത്തിന്റെ ഉപഭോഗം കാര്യമായി കൂടിയിട്ടുണ്ട്.

"കുംഭത്തിൽ കുടമെടുക്കണം' എന്നായിരുന്നു നനയുമായി ബന്ധപ്പെട്ട പഴമൊഴി. തെങ്ങിനെ സംബന്ധിച്ച് "കാല വർഷം അകത്തും തുലാവർഷം പുറത്തും' എന്നും. ആദ്യ മഴക്കാലത്ത് പെയ്യുന്ന വെള്ളം തെങ്ങിൻകുഴികളിൽ വീണ് മണ്ണാഴങ്ങളിലേക്ക് ഊർന്നിറങ്ങണം. രണ്ടാം മഴക്കാലത്തു പെയ്യുന്ന വെള്ളം മുഴുവൻ തടങ്ങളിലെ മേൽ മണ്ണിൽ സംഭരിക്കുകയും വേണം. അതാണ് അകത്തും പുറത്തും എന്നതിന്റെ പൊരുൾ. അതിനായി തടങ്ങളിൽ ജൈവ വസ്തുക്കൾകൊണ്ട് പുതയിടണം. അപ്പോൾ നന കുറച്ചു മതി. 'തെങ്ങിന് നനച്ചാൽ ഇരട്ടി വിളവ് എന്നും പഴയ കർഷകർക്കറിയാം.