മുത്തച്ഛൻമരങ്ങളുടെ അപൂർവ താഴ്വാരം

പൂർണവളർച്ചയെത്തിയ വിദേശമരങ്ങൾ കടൽ കടത്തിക്കൊണ്ടുവന്ന് നട്ടുവളർത്തിയ അപൂർവ വൃക്ഷോദ്യാനം

- ജയിംസ് ജേക്കബ് തുരുത്തുമാലി

വരണ്ടുണങ്ങിയ 150 ഏക്കറിലെ മണ്ണു വാരി കൂന കൂട്ടി 35 ചെറുകുന്നുകളുണ്ടാക്കുക. മുന്നൂറും മൂവായിരവും വർഷം പഴക്കമുള്ള നൂറുകണക്കിനു മുത്തച്ഛൻ മരങ്ങൾ പിഴുതെടുത്ത് കടൽ കടത്തി ഈ കുന്നുകളിൽ നട്ടുവളർത്തുക! അവയ്ക്കു ചുറ്റും വ്യത്യസ്ത ഉദ്യാന മാതൃകകൾ തീർക്കുക! അവിടെ നാനാദേശങ്ങളിൽനിന്നു നൂറുകണ ക്കിനു കലാകാരന്മാരെ വിളിച്ചുവരുത്തി സ്വന്തം ആശയമനുസരിച്ച് കല്ലിലും ലോഹത്തിലുമായി നൂറുകണക്കിനു ശിൽപങ്ങളും ഇൻസ്റ്റലേഷനുകളും തീർക്കുക മരങ്ങളോടു കമ്പം കയറി ഒരു കലാകാരൻ ചെയ്തുകൂട്ടിയ കാര്യങ്ങളാണിവയൊക്കെ. ഈ മഹായത്നത്തിന്റെ ഫലമാണ് ഹൈദരാബാദിനടുത്തുള്ള എക്സ്പീരിയം' എന്ന ബൊട്ടാണിക്കൽ ഗാർഡൻ. അപൂർവ അനുഭവങ്ങളുടെ സംഗമം എന്ന് ഈ ഗ്രീൻ കിങ്ഡം സംരംഭത്തെ വിശേഷിപ്പിക്കാം. ലോകത്തിൽ ഇതുപോലെ മറ്റൊന്നില്ലെന്ന് ഉറപ്പിക്കാം.