അരുമപ്പക്ഷികൾക്ക് ആരോഗ്യരക്ഷ

രോഗങ്ങൾ, പ്രതിരോധമാർഗങ്ങൾ

- ഡോ. ഉദയശ്രീ, ഡോ. ഉഷ നാരായണപിള്ള, ഡോ. അരുൺ ജോർജ്

ആനന്ദത്തിനും ആദായത്തിനുമായി അലങ്കാരപ്പക്ഷികളെ വളർത്തുന്നവർ ഏറെയാണ്. പ്രാവുകൾ, തത്തകൾ, ബഡ്ജീസ്, ഫിഞ്ചസ് എന്നീ ഇനങ്ങളിൽപെട്ട പക്ഷികളെയാണ് കൂടുതൽ പേരും പരിപാലിക്കുന്നത്. അലങ്കാരപ്പക്ഷികളുടെ ആരോഗ്യകാര്യങ്ങളിൽ സാമാന്യമായ അറിവെങ്കിലും പക്ഷിപരിപാലകർ നേടിയിരിക്കണം. നന്നായി തീറ്റയെടുക്കൽ, ആവശ്യത്തിന് ശരീരതൂക്കം, അനായാസമുള്ള പറക്കൽ, ആയാസരഹിതമായ ശ്വാസോ ച്ഛ്വാസം, മിനുസമുള്ള തൂവലുകൾ, മൂക്കിൽ നിന്നും കണ്ണിൽ നിന്നും വെള്ളമൊലിക്കാതിരിക്കൽ എന്നിവയാണ് ആരോഗ്യമുള്ള പക്ഷിയുടെ ലക്ഷണങ്ങൾ.

രോഗങ്ങൾ

ശ്വാസകോശം, ദഹനേന്ദ്രിയം എന്നിവയെ ബാധിക്കുന്ന രോഗങ്ങൾ, പരാദങ്ങൾ മൂലമുണ്ടാകുന്ന രോഗങ്ങൾ, ധാതു ലവണങ്ങളുടെയും വൈറ്റമിനുകളുടെയും ന്യൂനതകൾ മൂലമുണ്ടാകുന്ന രോഗങ്ങൾ എന്നിവയാണ് ഓമനപ്പക്ഷി കൾക്കു സാധാരണ കാണുന്ന ആരോഗ്യപ്രശ്നങ്ങൾ. ബാക്ടീരിയ, വൈറസ്, ഫംഗസ് എന്നിവയെല്ലാം ശ്വാസ കോശ രോഗങ്ങളുണ്ടാക്കാം.