വിഷാദമകറ്റും കൃഷി

വിശ്രമജീവിതകാലത്തെ വിരസത വിഷാദരോഗത്തിലേക്കു നീങ്ങാതെ ജീവിതം തിരിച്ചുപിടിക്കാൻ കൃഷി

- ഡോ. മരിയലിസ മാത്യു

സുനിൽ 56-ാം വയസ്സിൽ ഔദ്യോഗിക ജീവിതത്തിൽനിന്ന് മനസ്സില്ലാമനസ്സോടെയാണു വിരമിച്ചത്. സർക്കാർ നൂലമാലകളിൽ നിന്നും സ്ഥലംമാറ്റങ്ങളിൽ നിന്നും മോചനമായതായിരുന്നു ഏക ആശ്വാസം. ആദ്യത്തെ ഒരു മാസം വൈകിയുണരാനും വിശ്രമിക്കാനും ശ്രമിച്ചെങ്കിലും ഉറക്കം കൈവിട്ടു. ഒന്നും ചെയ്യാനില്ലാത്ത അവസ്ഥ എത്ര ഭീകരമാണെന്ന് അദ്ദേഹം മെല്ലെ തിരിച്ചറിഞ്ഞു. ഭർത്താവിന്റെ പോക്ക് വിഷാദത്തിലേക്കാണെന്നു ഭാര്യ സുനിത വേദനയോടെ മനസ്സിലാക്കി. “വീട്ടിൽ ചടഞ്ഞുകൂടി ഇരിക്കാതെ ഒരു ജോലി കണ്ടുപിടിക്കൂ'. അവർ പറഞ്ഞു. സുനിൽ ശ്രമിച്ചു, പക്ഷേ വിജയിച്ചില്ല.

“കാടുപിടിച്ച ഈ പറമ്പിൽ എന്തെങ്കിലും ചെയ്തു കൂടെ?'' എന്നു ഭാര്യ. സുനിലിന്റെ മനസ്സിൽ ഉറങ്ങിക്കിടന്ന കൃഷി, മൃഗസംരക്ഷണമോഹങ്ങൾ അതു കേട്ട് ഞെട്ടിയുണർന്നു.