കേരളം തമിഴ്നാട്ടിൽ

വിശ്രമജീവിതത്തിനായി സമ്മിശ്രകൃഷിയിടമൊരുക്കിയ കോയമ്പത്തൂരിലെ ദമ്പതിമാർ

- ജെ. ജോസഫ്

 "ഈ 23 ഏക്കർ സ്ഥലം വൈകാതെ ഞങ്ങളൊരു കൊച്ചു കേരളമാക്കി മാറ്റും...', വേപ്പിലും തേക്കിലും മലവേമ്പിലുമെല്ലാം പടർന്നു കയറി കായ്ച്ചു തുടങ്ങിയ കുരുമുളകുചെടികൾക്കിടയിലൂടെ ആവേശത്തോടെ നടക്കു ന്നതിനിടയിൽ കോയമ്പത്തൂരിനടുത്ത് ദീനംപാളയത്തുള്ള ഡോ. മാണിക്യരാജും ഭാര്യ രത്തനവും പറയുന്നു. അവരുടെ വാക്കുകൾ യാഥാർഥ്യമാകാൻ ഏറെ വൈകില്ല. കുരുമുളകും ജാതിയും കാപ്പിയും മാവും സപ്പോട്ടയും മഞ്ഞളും പച്ചമുളകും തേനീച്ചകളും നാടൻ പശുക്കളും നാട്ടുകോഴിയുമെല്ലാം ചേരുന്ന 'സീതാവനം' ഇപ്പോൾത്തന്നെ കേരളത്തിലെ ഒരു സമ്മിശ്ര കൃഷിയിടം പോലെ.

പാരമ്പര്യത്തിലേക്കു വീണ്ടും

കൃഷി രക്തത്തിലുണ്ടെന്നു ഡോക്ടർ. ശരിക്കും പറഞ്ഞാൽ കൃഷിയാണ് ഇഷ്ടം. ഡോക്ടറായത് ആകസ്മികമെന്നു മാണിക്യരാജ്. തലമുറകളായി കൃഷികുടുംബമാണ് അദ്ദേഹത്തിന്റേത്. ദീനം പാളയത്തെ ഭൂമി 7 തലമുറകളായി കുടുംബസ്വത്ത്. തെങ്ങായിരുന്നു മുഖ്യ വിള. മാണിക്യരാജും സഹോദരങ്ങളുമൊക്കെ ഉദ്യോഗത്തിലേക്കു തിരിഞ്ഞതോടെ കൃഷിയിടങ്ങൾ പലതും ശോഷിച്ചു. ദീനം പാളയത്തെ 23 ഏക്കർ ഏറക്കുറെ പാഴ്ഭൂമിയായി. എന്നാൽ, ഒരു ഘട്ടത്തിൽ ജോലിത്തിരക്കു കൾ മാറ്റിവച്ചു കൃഷിയിലേക്കു തിരിയാൻ തീരുമാനിച്ചു മാണിക്യരാജും രത്തനവും. സർക്കാർ സർവീസിൽ നിന്നു വിആർഎസ് എടുത്തു ഡോക്ടർ. പ്രാക്ടീസ് തുടർന്നെങ്കിലും കൃഷിയിൽ കൂടുതൽ ശ്രദ്ധവച്ചു. രത്‌നം പൂർണമായി കൃഷിയിൽ മുഴുകി. ഇന്ന് ഈ ദമ്പതികളുടെ ജീവിതം ഏറ്റവും ആഹ്ലാദഭരിതമാക്കുന്നത് ഈ കൃഷിയിടമാണ്.