അഞ്ചാം വേദം

അഞ്ച് ദശലക്ഷം വർഷങ്ങൾക്ക് മുൻപ് ജർമ്മനിയിലെ നിയാണ്ടർ താഴ് വരയിൽ മനുഷ്യൻ ഉണ്ടായി എന്ന് ശാസ്ത്രം പറയുന്നു. ഭൂമിയിലെ പൊടികൊണ്ട് ദൈവം തന്നെപ്പോലെ തന്നെ മനുഷ്യനെ സൃഷ്ടിച്ചു എന്ന് മതഗ്രന്ഥങ്ങളിലും പ്രതിപാദിക്കുന്നു.

- 

ശാസ്ത്രമോ ദൈവമോ സത്യം എന്തുതന്നെ ആയാലും, ഒരു മനുഷ്യനും ഇന്നുവരെ കണ്ട് പരിചയമില്ലാത്ത ഒരു സങ്കൽപം മാത്രമാണ് ദൈവം എന്നതാണ് പരമമായ സത്യം. 

ആദിമ മനുഷ്യർ വെളിച്ചം നൽകിയ സൂര്യനെയും ഇരുളിൽ തിളങ്ങിയ ചന്ദ്രനെയും ദൈവമായി കണ്ടു. കാലാവസ്ഥാവ്യതിയാനങ്ങളെയും പ്രകൃതി ക്ഷോഭങ്ങളെയും ഭയന്ന അവർ കല്ലിനെയും മരങ്ങളെയും ഒക്കെ അമാനുഷിക ശക്തികളായി കണ്ട് ആരാധിച്ചു.

കാലം പിന്നിട്ടപ്പോൾ അജ്ഞരായ മനുഷ്യരുടെ ഭയത്തെ മുതലെടുത്ത ബുദ്ധിമാൻമാരായ ചിലർ അവരെ കൺകെട്ട് വിദ്യകളാൽ ഭയപ്പെടുത്തി പ്രാകൃതമായ വിവിധ ആചാരാനുഷ്ഠാനങ്ങൾക്കു വിധേയരാക്കി മതവിശ്വാസങ്ങളിൽ തളച്ച് തങ്ങളുടെ അടിമകളാക്കി.

അവിശ്വാസികൾ ആയ മറ്റു ചില മനുഷ്യർ ശാസ്ത്രീയമായി ചിന്തിച്ചു. ചവുട്ടിനിന്ന വെറും മണ്ണിൽ നിന്നും ചുറ്റിലും കണ്ട് കൊടുംകാട്ടിൽ നിന്നും അവരുടെ ശാസ്ത്രചിന്തകൾ പുരോഗമിച്ചു. ഈ സമയം മതപുരോഹിതന്മാർ അവരെ ദൈവ വിശ്വാസങ്ങൾക്ക് വിപരീതമായി ചിന്തിക്കുന്ന സാത്താന്റെ പ്രതിരൂപങ്ങളായി ചിത്രീകരിച്ചു.