சம்பிரதாயம்

“ஆட்டோ எல்லாம் உள்ளே விட முடியாதுங்க...” காவலாள் கண்ணியமாகத்தான் சொன்னாலும் பேரம் பேசமுடியாத கறார்த்தனமும் தெரிந்தது. சங்கர் அந்த கல்யாண மண்டபத்தின் வாசலில் இறங்கி உள்ளே பார்த்தான்.

- பினாத்தல் சுரேஷ்

வாழை மரப் பந்தல் கட்டி ‘நித்யா வெட்ஸ் ஸ்ரீராம்’ பல வண்ணங்களில் தெர்மோகோலில் ஜொலித்தது.

பிரம்மாண்டமான இரும்பு கேட்டை அதன் ஓரத்தில் மூன்றடிக்கு மூன்றடியில் இருந்த கூண்டு திறந்து மூடிக்கொண்டிருந்தது. உள்ளே பாதை இரண்டாகப் பிரிந்து கார்கள் மைதானத்தில் கோலமாவு போட்டிருந்த பார்க்கிங்குக்குச் செல்ல, நடப்பவர்களை வரவேற்க பட்டுப் பாவாடைச் சிறுமியர் பன்னீர் சொம்புடன் இன்னொரு வழியில் காத்திருந்தனர்.

ஒரு டிஜே வரும் ஆட்களுக்குத் தகுந்த பாட்டுகளைப் போட்டுக் கொண்டிருக்க பகலிலும் எரிந்துகொண்டிருந்த விளக்குத் தோரண வழியில் நடப்பவர்களை “ஆடுங்க மாமி...” என்று இளம் பெண்கள் ஊக்குவித்துக் கொண்டிருந்தார்கள். வீடியோவில் அவர்கள் ஆடுவதைப் பார்க்க இரண்டு மூன்று டிவிக் கள் வேறு இருந்தன.

அப்பாவைக் கூட்டிக் கொண்டு நடக்க வேண்டும். இவர்களையும் ஆடச் சொல்வார்களா? ஆட்டோவுக்குக் காசு கொடுத்துவிட்டு அப்பாவைக் கைத்தாங்கலாக அழைத்துக்கொண்டு உள்ளே நடந்தான் சங்கர்.

காவலாளி பின்னாலே ஒரு புத்தகத்தை எடுத்துக்கொண்டு ஓடிவந்தான். "சார் இதுல பேர், ஃபோன் நம்பர் ... "

அப்பா பொறுமையாக நடந்தார். "என்னடா அவசரம், ஒன்பது மணிக்குத்தானே முகூர்த்தம்?”

சிறுமிகள் இவர்களைப் பார்த்து "சந்தனம் எடுத்துக்கங்க ...

"யாரோ ஒருவர் "சாருக்கு ஒரு வீல்சேர் கொண்டு வாடா ... "

பணக்காரக் கல்யாணங்களில் எல்லாவற்றையும் யோசிக்கிறார்கள். சங்கர் வீல்சேரில் அப்பாவை உட்கார்த்தி நகர்த்தினான்.

"மணமாலையும் மஞ்சளும் சூடி ... " என்றது பாட்டு. அந்த டிஜேவுக்கு அப்பாவுக்குப் பொருத்தமாக வேறு எந்தப்பாட்டும் தோன்றவில்லை போல. ஏதாவது சோகப்பாட்டு போட்டிருக்கலாம். அவனுக்கென்ன தெரியும் பாவம்.

அந்தப் பாதையைத் தாண்டியவுடன் ஒரு கோட் ஆசாமி "நேரா டிபன் சாப்பிட்டிடலாம் சார். நான் வழி காட்டறேன் ... "கல்யாணம் போலவே இல்லை. திருவிழா போல இருந்தது. ஒருபக்கம் மருதாணி இட்டுவிட ஒரு ராஜஸ்தானிப் பெண்ணுக்கு முன்னால் வரிசை நீண்டுகொண்டிருந்தது.

டீக்கடை போல முகப்பு அமைக்கப்பட்டு காபி பட்டுவாடா நடந்துகொண்டிருந்தது. மினரல் வாட்டர் டம்ளர்கள் ஐந்தடிக்கு ஒரு அட்டைப் பெட்டி இருந்தது. பானி பூரி கடை ஃபோட்டோ பூத் எல்லாம் தாண்டி சாப்பாட்டு ஹால்.