உலகிலேயே அதிக சப்ஸ்கிரை பர்களைக் கொண்ட யூடியூபர்!

ஒவ்வொரு மாதமும் பல்வேறு காரணங்களுக்காக யூடியூபை பயன்படுத்துபவர்களின் எண்ணிக்கை, 250 கோடி.

- த.சக்திவேல்

‘கூகுள்’ தேடல் தளத்துக்குப் பிறகு அதிகமான பயனாளிகளைக் கொண்ட இணையதளமும் இதுவே. தினமும் யூடியூப்பில் பார்க்கப்படுகின்ற வீடியோக்களின் நேரத்தைக் கணக்கிட்டால் 100 கோடி மணி நேரத்தைத் தாண்டும்.

ஒவ்வொரு நிமிடமும் பதிவேற்றப்படும் வீடியோக்களே 500 மணி நேரத்தைத் தாண்டி ஓடுகின்றன. இதுவரை யூடியூப்பில் பதிவேற்றப்பட்டிருக்கும் வீடியோக்களின் எண்ணிக்கை 1400 கோடியைத் தாண்டிவிட்டது. மட்டுமல்ல, 11.4 கோடி யூடியூப் சேனல்கள் இயங்கிக் கொண்டிருக்கின்றன. இதில் தனி நபர்கள், பிரபலங்கள், பிராண்டுகள், பெரு நிறுவனங்களின் சேனல்களும் அடங்கும்.

இவ்வளவு யூடியூப் சேனல்களில் அதிக சப்ஸ்கிரைபர்களைக் கொண்ட சேனலாக மிளிர்கிறது ‘MrBeast’.

ஜிம்மி என்பவரின் சேனல் இது. இதன் சப்ஸ்கிரைபர்களின் எண்ணிக்கை 27.9 கோடி. இதுவரை நம்பர் ஒன் இடத்திலிருந்த ‘T-Series’ எனும் இசை மற்றும் பொழுதுபோக்குத்துறை சார்ந்த நிறுவனத்தின் சேனலை பின்னுக்குத் தள்ளியிருக்கிறார் ஜிம்மி என்கிற தனி மனிதர்.

இவரை ‘மிஸ்டர் பீஸ்ட்’ என்றே யூடியூப் பயனாளிகள் அழைக்கின்றனர்.

அமெரிக்காவின் கான்சாஸ் மாகாணத்தில் அமைந்துள்ள விச்சிதா நகரில், 1998ம் வருடம் பிறந்தார், ஜேம்ஸ் ஸ்டீபன் டொனால்டுசன். சுருக்கமாக ஜிம்மி.

இவருக்கு ஒன்பது வயதாக இருந்தபோதே பெற்றோர் பிரிந்துவிட்டனர். பேஸ்பால் விளையாட்டில் ஆர்வமுடையவராக இருந்த ஜிம்மி, சிறு வயதிலேயே யூடியூப்பில் நுழைந்துவிட்டார். பொழுதுபோக்குக்காக யூடியூப்பில் வீடியோக்களைப் பதிவிட்டு வந்த ஜிம்மி, மேற்படிப்புக்காக கிழக்கு கரோலினா பல்கலைக்கழகத்தில் சேர்ந்தார். கொஞ்ச நாட்களிலேயே கல்லூரியிலிருந்து நின்றுவிட்டு, நண்பர்களுடன் சேர்ந்து யூடியூப் ஆராய்ச்சியில் இறங்கினார்.