'ஓ... நீங்கதான் வில்லன் கேரக்டர் பண்றீங்களா?'

நடிகனாக அல்லாமல் கதாபாத்திரமாக மனதில் நிற்பவர். சேலத்துக்காரராக இருந்தாலும் எல்லா வட்டார வழக்கும் இவர் நாக்கில் நடனம் ஆடும். படப்பிடிப்பில் பிஸியாக இருந்த நடிகர் விவேக் பிரசன்னாவிடம் பேசினோம்.

- தா.பிரகாஷ்

'சொந்த ஊர் சேலம் பக்கம், சின்னனூர். படித்ததெல்லாம் அரசுப் பள்ளி, தமிழ் வழியில். அப்பா வழக்கறிஞர், அம்மா நர்ஸ். இரண்டு சகோதரர்கள். நான் கடைக்குட்டி.

நடிகர் ரகுவரன், இயக்குநர் பாலுமகேந்திரா ஆகிய இருவரும்தான் நான் சினிமாவுக்கு வரக் காரணம். அவர்களை நேரில் பார்க்க நினைத்தேன். ரகுவரனை கடைசிவரை பார்க்க முடியவில்லை. அவர் இறந்தபோது, அவரின் உடலைப் பார்க்க மனமில்லாமல் வீட்டிலேயே அழுது கொண்டிருந்தேன். ஒவ்வொரு காட்சியிலும் நடிப்பதற்கு முன்னர் ரகுவரனை மனதில் நினைத்துக் கொள்வேன்.

நான் இதழியல் படிக்கத்தான் சென்னை வந்தேன். கல்லூரி இரண்டாம் ஆண்டில் சொந்தமாக காமிரா வாங்கிவிட்டேன். புகைப்படங்கள் எடுத்துத் தள்ளினேன். ஒளிப்பதிவாளர் கனவு, கல்லூரி முடிக்கையில் மரமாக வளர்ந்து நின்றது.