എല്ലാവർക്കും ചേരുമോ? എൻജിനിയറിങ്

വലിയ വിഭാഗം കുട്ടികൾ ഉപരിപഠനത്തിനു തിരഞ്ഞെടുക്കുന്ന മേഖലയാണിത്. പക്ഷേ, അങ്ങനെ എല്ലാവർക്കും പഠിക്കാവുന്നതാണോ എൻജിനിയറിങ് കരിയർ ഗുരു വിശദീകരിക്കുന്നു.

- ബി.എസ്.വാരിയർ

എന്താണ് എൻജിനീയറിങ്?' എൻജിനീയറിങ് പഠിക്കണമെന്ന് ആഗ്രഹിക്കുന്ന പല കുട്ടികളോടും ചോദിച്ചപ്പോഴെല്ലാം വിസ്മയിപ്പിക്കുന്നതായിരുന്നു മറുപടികൾ. അണക്കെട്ടു പണിയുന്നത്, കംപ്യൂട്ടർ നിർമിക്കുന്നത്, ട്രെയിനുകൾ രൂപകൽപന ചെയ്യുന്നത് എന്നു തുടങ്ങി വ്യത്യസ്തമായ ധാരാളം ഉത്തരങ്ങൾ കിട്ടി. ഉപചോദ്യങ്ങൾ വന്നപ്പോൾ മിക്കവരും ഏതാണ്ട് ഒരേ ഉത്തരത്തിലെത്തി സോഫ്റ്റ്വെയർ രംഗത്തു പെട്ടെന്നു ജോലി സമ്പാദിക്കാനുള്ള പഠനവിഷയം.

അനിവാര്യ മേഖല

പണ്ട് എൻജിനീയറിങ് പഠിച്ചു യോഗ്യത നേടിയവരിൽ ഭൂരിപക്ഷവും ആ മേഖലയിൽ ജോലി കണ്ടെത്തിയിരുന്നു. ഇന്ന് ഇന്ത്യയിൽ അങ്ങനെയുള്ളവർ ഏഴു ശതമാനത്തിൽ താഴെ മാത്രം. പല ശാഖകളിലെയും ബി ടെക്കുകാരെ പരിഗണിച്ചുള്ള ശരാശരി കണക്കാണിത്. അതേ സമയം, ബിടെക് സീറ്റുകൾ അടുത്ത കാലത്തു ഗണ്യമായി വർധിച്ചു. കോളജുകളിൽ ധാരാളം സീറ്റുകൾ ഒഴിഞ്ഞു കിടക്കുന്നു എന്ന കാരണങ്ങളാൽ, ഈ രംഗത്തെ പഠനം കൊണ്ടു വലിയ പ്രയോജനമില്ലെന്ന മട്ടിൽ ചിലർ സംസാരിക്കാറുണ്ട്. അടിസ്ഥാനരഹിതമായ അഭിപ്രായമാണിത്. ആധുനികജീവിതത്തിന് എൻജിനീയറിങ്ങിന്റെ അനുഗ്രഹങ്ങൾ കൂടിയേ തീരൂ. പുതിയ കെട്ടിടങ്ങൾ, പാലങ്ങൾ, എയർപോർട്ടുകൾ, തുറമുഖങ്ങൾ, വാഹനങ്ങൾ മുതലായവ മാത്രമല്ല, ഇലക്ട്രോണിക്സ്, കംപ്യൂട്ടർ, ഐടി എന്നിവയുടെ സിദ്ധികളും കൂടാതെ നമുക്കു ജീവിക്കാനാകുമോ? വൈദ്യുതിയില്ലാതെ ജീവിതമുണ്ടോ? എൻജിനീയറിങ്ങിന്റെ പ്രസക്തി ഏറുകയല്ലാതെ ഒരിക്കലും കുറയില്ല. ഈ മേഖലയിൽ അറിവും പ്രാവീണ്യവും ആർജിക്കുന്ന സമർഥർക്കു മികച്ച കരിയർ രൂപപ്പെടുത്താൻ കഴിയും. നല്ല കോളജിൽ പഠിച്ച് നല്ല നിലയിൽ ജയിക്കുന്നവരെ മികച്ച തൊഴിലവസരങ്ങൾ കാത്തിരിക്കുന്നു.

എൻജിനീയറിങ് എന്നാൽ?