സ്ത്രീവിമോചക

ദേവകി നിലയങ്ങോട്

- ഇ.ഡി. ഡേവിസ്

സാമൂഹ്യ നവോത്ഥാന നായകനായ വി.ടി. ഭട്ടതിരിപ്പാടിന്റെ സ്ത്രീവിമോചന പ്രവർത്തനങ്ങൾ വളരെ ചരിത്രപ്രസിദ്ധമാണ്. അദ്ദേഹത്തിന്റെ രജനീരംഗം എന്ന കഥാസമാഹാരം 1928 ഒക്ടോബറിൽ ആണ് പ്രസിദ്ധീകരിച്ചത്. അതും അത്യന്തം പഴകിയ സാമൂഹ്യവ്യവസ്ഥയെ കടപുഴക്കാനുള്ള സാഹിതിയുടെ ആരംഭമായിരുന്നു. ആ വർഷം തന്നെയാണ് ദേവകി നിലയങ്ങോട് എന്ന സ്ത്രീവിമോചന പ്രവർത്തക ജനിച്ചത്. ജനിച്ച തീയതിയോ മാസമോ അറിയില്ല. അവരുടെ "നഷ്ടബോധങ്ങളില്ലാതെ' എന്ന ആത്മകഥയിലും തീയതി രേഖപ്പെടുത്തിയിട്ടില്ല.