സുവർണ്ണ സ്വപ്നങ്ങൾക്ക് ചാരുതയേകിയ ഭാഗ്യതാരകം

സംരംഭകൻ, സാമൂഹികപ്രവർത്തകൻ തുടങ്ങി വിശേഷണങ്ങൾ ഏറെയാണ് ഇദ്ദേഹത്തിന്. കൊല്ലം ജില്ലയിലെ കൊട്ടാരക്കര താലൂക്കിൽ വിലങ്ങറ എന്ന ഗ്രാമത്തിൽ അധ്യാപകനായ വി എൻ നാരായണപിള്ളയുടെയും ഓമനഅമ്മയുടെയും മകനായി ജനനം. വിദ്യാഭ്യാസത്തിന് ശേഷം ബിസിനസ്സിന്റെ വിശാലമായ ലോകത്തേക്ക് എത്തിപ്പെടുകയും സ്വപ്രയത്നത്താൽ സ്വർണ്ണവ്യാപാരരംഗത്ത് തനതായ മുദ്ര പതിപ്പിക്കുകയും ചെയ്തു. തങ്കത്തിളക്കത്തോടെ സാധാരണക്കാരുടെ മനസ്സിലിടംപിടിച്ച ഭാഗ്യ ഗോൾഡ് ആൻഡ് ഡയമണ്ട്സിന്റെ സ്ഥാപകനും സി ഇ ഒ യുമായ സുനിൽ ഭാഗ്യയുമായി യൂണിക്ടേംസ് സബ് എഡിറ്റർ ഷീജാ നായർ നടത്തിയ അഭിമുഖം

- ഷീജാ നായർ

സ്വർണ്ണവ്യാപാരത്തിലേക്ക് കടക്കാൻ താങ്കളെ പ്രേരിപ്പിച്ചതെന്താണ് ? കൊല്ലം ജില്ലയിലെ ഗ്രാമപ്രദേശത്തെ ഒരു ഇടത്തരം കുടുംബത്തിലാണ് ഞാൻ ജനിച്ചത്. എന്റെ കോളേജ് വിദ്യാഭ്യാസത്തിനു ശേഷം ഒരു ജോലി എന്നതിനെപ്പറ്റി ചിന്തിക്കുന്ന സമയത്താണ് കംപ്യൂട്ടർ വിപ്ലവം നടപ്പിലാക്കുന്നത്. അതിന്റെ സാദ്ധ്യതകൾ മനസ്സിലാക്കി ഡിപ്ലോമ ഇൻ കംപ്യൂട്ടർ ആപ്ലിക്കേഷൻ കഴിഞ്ഞതിനു ശേഷമുള്ള കാലയളവിലാണ് സ്വന്തമായി ഒരു ബിസിനസ്സ് എന്ന ആശയം ഉടലെടുക്കുന്നത്. അങ്ങനെയാണ് എ എസ് ബാങ്കേഴ്സ് എന്ന പേരിൽ ഫിനാൻഷ്യൽ സ്ഥാപനം തുടങ്ങുന്നത്. അഞ്ച് വർഷം ഈ മേഖലയിൽ ആയിരുന്നു. സാഹചര്യങ്ങൾക്കനുസരിച്ച് പുതിയ ബിസിനസ്സ് എന്ന ആലോചനയിലാണ് 2005 ൽ ഓടനാവട്ടം എന്ന സ്ഥലത്ത് ഭാഗ്യ ജൂവലേഴ്സ് എന്ന സ്ഥാപനം പാർ ട്ണർഷിപ്പിൽ ആരംഭിക്കുന്നത്.

സ്വർണ്ണവ്യാപാരമേഖലയിൽ നേരിടേണ്ടിവരുന്ന കഠിനമായ വെല്ലുവിളികളെന്തൊക്കെയാണ്?

അനിയന്ത്രിതമായ വില വർദ്ധനയാണ് ഇന്ന് സ്വർണ്ണവ്യാപാരമേഖല നേരിടുന്ന പ്രധാന വെല്ലുവിളി. 2005 ൽ ഞങ്ങളുടെ സ്ഥാപനം ആരംഭിക്കുമ്പോൾ ഒരുപവൻ സ്വർണ്ണത്തിന്റെ വില 4550 രൂപയായിരുന്നു. ഇന്നത് ഒരു ലക്ഷത്തിലേക്ക് അടുക്കുന്നു. സ്വർണ്ണവില ദിനംപ്രതി മാറ്റങ്ങളുണ്ടാക്കുന്നത് വ്യാപാരികൾക്ക് വിലനിശ്ചയത്തിലും സ്റ്റോക്ക് മാനേജ്മെന്റിലും ബുദ്ധിമുട്ടുണ്ടാക്കുന്നു. അതേസമയം വില പെട്ടെന്ന് താഴുകയാണെങ്കിൽ നഷ്ടം നേരിടേണ്ടി വന്നേക്കാം, ഉയർന്നാൽ ഉ പഭോക്താക്കളുടെ വാങ്ങൽ താൽപര്യം കുറയാം. ഓൺലൈൻ ഷോപ്പിങ്ങിന്റെയും ഡിജിറ്റൽ മാർക്കറ്റിങ്ങിന്റെയും വളർച്ച പരമ്പരാഗത ജ്വല്ലറി ഷോറൂമുകൾക്ക് മത്സരം സൃഷ്ടിക്കുന്നുവെന്നുള്ളതും ഒരു വെല്ലുവിളിയാണ്. എന്നിരുന്നാലും സാധാരണക്കാരന്റെ ചെറിയ സമ്പാദ്യം അല്ലെങ്കിൽ നിക്ഷേപം എന്നുള്ള നിലയിൽ സ്വർണ്ണം ഇപ്പോഴും മുന്നിൽത്തന്നെയാണ്. ഉപയോഗിക്കുന്നതിനോടൊപ്പം അതൊരു മുതൽക്കൂട്ട് തന്നെയാണെന്നുള്ളതിന്റെ തെളിവാണ് ഈ വിലക്കയറ്റത്തിലും ഞങ്ങളുടെ ഷോപ്പുകളിലെ തിരക്ക് വെളിവാക്കുന്നത്. ചെറിയ ചെറിയ തുകകൾ സ്വരുക്കൂട്ടി അത് സ്വർണ്ണാഭരണമാക്കുക എന്നത് കാലങ്ങളായി ജനമനസ്സുകളിൽ പതിഞ്ഞൊരു വസ്തുതയാണ്.

സ്വർണ്ണവ്യാപാരരംഗം ഡിജിറ്റൈസേഷനായപ്പോൾ വന്ന മാറ്റങ്ങൾ എന്തൊക്കെയാണ്? അത് ബിസിനസ്സിന് എത്രമാത്രം സഹായകമായി?