അന്യസംസ്ഥാന വാഹനങ്ങൾ വാങ്ങുമ്പോൾ

മറ്റു സംസ്ഥാനങ്ങളിൽനിന്നുള്ള വാഹനങ്ങളുടെ റജിസ്ട്രേഷന് എൻഒസി നിർബന്ധമാണ്

- റോഷ്നി കെ.

ദുൽഖർ സൽമാന്റെ കാർ പിടിച്ചെടുത്തതോടെ വാർത്തകളിൽ ഇടം നേടിയിരിക്കുകയാണ് അന്യസംസ്ഥാന വാഹനങ്ങൾ. ഡൽഹി ഉൾപ്പെടെയുള്ള അന്യസംസ്ഥാന റജിസ്ട്രേഷനിലുള്ള വാഹനങ്ങളുടെ കുത്തൊഴുക്കാണ് ഇവിടെ.

കേരളത്തിനു പുറത്തു റജിസ്റ്റർ ചെയ്തിരിക്കുന്ന വാഹനങ്ങൾ വാങ്ങുന്നതിനു മുൻപ് തട്ടിപ്പാണോ അല്ലയോ എന്നു പരിശോധിച്ചിരിക്കണം. അല്ലെങ്കിൽ തലവേദന ഒഴിഞ്ഞ നേരമുണ്ടാകില്ല.

ഇടനിലക്കാരിൽനിന്നു വാഹനം വാങ്ങുമ്പോഴാണ് കൂടുതലും പറ്റിക്കപ്പെടുന്നത്. "എല്ലാം ശരിയാക്കിത്തരാം' എന്ന വാക്കിൽ വിശ്വസിക്കുന്നവരാണ് കബളിപ്പിക്കപ്പെടുന്നവരിൽ ഏറെയും. മലിനീകരണ നിയന്ത്രണങ്ങൾ വന്നതോടെ ഡൽഹിയിൽ പത്തു വർഷത്തിലധികം പഴക്കമുള്ള ഡീസൽ വാഹനങ്ങളും 15 വർഷത്തിലധികം പഴക്കമുള്ള പെട്രോൾ വാഹനങ്ങളും ഉപയോഗി ക്കുന്നത് നിരോധിച്ചു. അതിനുശേഷമാണ് വൻലാഭത്തിൽ സെക്കൻഡ് ഹാൻഡ് വണ്ടികൾ കേരളത്തിലേക്ക് എത്തിത്തുടങ്ങിയത്.

ആരൊക്കെ റജിസ്റ്റർ ചെയ്യണം?

മറ്റു സംസ്ഥാനങ്ങളിൽ നിന്നു വരുന്ന വാഹനങ്ങൾ താൽക്കാലികമായി ഉപയോഗിക്കാമെങ്കിലും സ്ഥിരമായി ഇവിടെ ഓടിക്കുകയാണെങ്കിൽ ചില നടപടിക്രമങ്ങൾ പൂർത്തിയാക്കേണ്ടതുണ്ട്.

ജോലിയുടെ ഭാഗമായി കേരളത്തിൽ വന്നു താമസിക്കുന്നവർ, അവരുടെ വാഹനം സംസ്ഥാനത്ത് ഉപയോഗിക്കണമെങ്കിൽ റോഡ് നികുതി നൽകണം.

സംസ്ഥാനത്തിലെ ലൈഫ് ടൈം ടാക്സിന്റെ 15 ൽ ഒരു ഭാഗം നികുതിയായി അടച്ച് ഒരു വർഷം വരെ കേരളത്തിൽ അത്തരം വാഹനങ്ങൾ ഉപയോഗിക്കാം. എന്നാൽ, വാഹനത്തിന്റെ റജിസ്ട്രേഷൻ മാറ്റുകയോ എൻഒസി എടുക്കുകയോ ചെയ്യേണ്ടതില്ല. എന്നാൽ, കേരളത്തിൽ റീറജിസ്റ്റർ ചെയ്യാൻ ഉദ്ദേശിക്കുന്ന വാഹനമാണെങ്കിൽ എൻഒസി നിർബന്ധമാണ്. എൻഒസി എടുത്തു വരുന്ന വാഹനങ്ങൾക്ക് 14 ദിവസത്തിനുള്ളിൽ കേരളത്തിലെ നികുതി അടയ്ക്കുകയും ഒരു മാസത്തിനുള്ളിൽ ഇവിടെ റജിസ്ട്രേഷൻ ചെയ്യുകയും വേണം. ഒരു മാസത്തിനുള്ളിൽ റജിസ്ട്രേഷൻ ചെയ്യാൻ കഴിഞ്ഞില്ലെങ്കിൽ മോട്ടർസൈക്കിളുകൾക്ക് 300 രൂപയും കാറുകൾക്ക് 500 രൂപയും ഓരോ മാസവും ലേറ്റ് ഫീസ് ആയി ഈടാക്കും.