ദൈവത്തിന്റെ സ്വന്തം റൂട്ട്

ഇലവീഴാപ്പൂഞ്ചിറയിൽനിന്ന് കാഞ്ഞാർ, മൂലമറ്റം, പൈനാവ്, ചെറുതോണി, ചേലച്ചുവട്, കഞ്ഞിക്കുഴി, വെൺമണി, വണ്ണപ്പുറം വഴി തൊടുപുഴയിലേക്ക് ഒരു ട്രിപ്പായാലോ? മാരുതി സുസുകി ഗ്രാൻഡ് വിറ്റാരയിൽ ഇടുക്കിയുടെ മണ്ണിലെ ഓൾ ടെറയ്ൻ ട്രിപ്പിന്റെ വിശേഷങ്ങൾ

- സുനിഷ് തോമസ്

ഒരു പേരിലൊക്കെ എന്തിരിക്കുന്നു എന്നു ചോദിച്ച വില്യം ഷേക്സ്പിയറിനെയാണ് ഇവിടെ നിൽക്കുമ്പോൾ ഓർമ വരിക

 നാട്ടിലെ കൊച്ചുകവല പോലും കലാബോധത്തോടെ അർഥ ഭംഗിയുള്ള കിടുക്കൻ പേരുകളിട്ട ഇടുക്കിക്കാരുടെ മുന്നിൽ വന്നുനിന്ന് ഒരിക്കൽക്കൂടി പറയട്ടെ, ഷേക്സ്പിയർ. അവർ മറുപടി പറയും ഒരു പേരിൽ എന്തിരിക്കുന്നുവെന്ന്

കാരണം, ഫാസ്റ്റ് ട്രാക്ക് ടീം നിൽക്കുന്നത് ഇലവീഴാപ്പൂഞ്ചിറയിലാണ്; മേഘപ്പാത്തിയിൽനിന്ന് ഊർന്നിറങ്ങുന്ന കോടമഞ്ഞ് കാറ്റിന്റെ ചിറകിൽ ഭൂമിയിൽ വന്നു തൊടുന്നയിടം. ഈ സ്ഥലത്തിന് ഇലവീഴാപ്പൂഞ്ചിറ എന്ന കവിത തുളുമ്പുന്ന പേരിടാൻ ഇടുക്കിക്കാർക്കല്ലാതെ ആർക്കു കഴിയും? 

ഇരുനൂറ് ഏക്കറോളം പരന്നു കിടക്കുന്ന ഇവിടെ ഒരില പോലും വീഴില്ലത്രേ! കാരണം, ഇല വീഴാൻ ഇവിടെ മരങ്ങളില്ല, ആകെയുള്ളത് കുറെ ചുറ്റീന്തുകളും കുറ്റിച്ചെടികളും മാത്രം. ഇലവീഴാപൂഞ്ചിറയ്ക്ക് എപ്പോഴാണ് നാണം വരികയെന്നു പറയാൻ വയ്യ. അടുത്ത നിമിഷം മാമലകൾക്കു മീതെ വെള്ളി കസവുള്ള മഞ്ഞിൻ ചേലയിട്ടുമൂടും പൂഞ്ചിറ

“പൂഞ്ചിറ' എന്ന പേരിൽ ഒരു മലയാള സിനിമ വരും വരെ കോട്ടയം, ഇടുക്കി ജില്ലകൾക്ക് അപ്പുറത്തേക്ക് അധികം പേർക്ക് അറിവില്ലായിരുന്ന സ്ഥലം. അതിരാവിലെ സ്ഥലത്തെത്തി. തിരക്കു തുടങ്ങുന്നതേയുള്ളൂ. വ്യൂപോയിന്റിലേക്കും പൂഞ്ചിറയുടെ അദൃശ്യഭംഗികളിലേക്കും സഞ്ചാരികളെ എത്തിക്കാൻ സഫാരി ജീപ്പുകൾ കവാടത്തിലുണ്ട്. അതിൽ കയറിയാൽ അല്ലലില്ലാതെ വ്യൂപോയിന്റിലെത്താം. അവിടെ 360 ഡിഗ്രി കാഴ്ചയുണ്ട്. ഒരു വശത്തേക്കു നോക്കിയാൽ മൂലമറ്റം പവർഹൗസും തൊടുപുഴയും മുട്ടവും ഇടുക്കി മല നിരകളും കാണാം. മറുവശത്ത് ആലപ്പുഴ ലൈറ്റ് ഹൗസ് മുതൽ കൊച്ചി കായലും കടലും വരെ നല്ല നേരങ്ങളിൽ കാണാമെന്ന് ഇവിടത്തെ പതിവുകാർ പറയുന്നു. കോടമഞ്ഞ് മാറിനിന്നെങ്കിൽ മാത്രമേ ആ ഭാഗ്യം ഉണ്ടാകൂ. അല്ലെങ്കിലും ഇവിടെ നിൽക്കുന്നത് ഒരു ഭാഗ്യമാണ്. എത കഠിനഹൃദയനെയും കോടമഞ്ഞ് ഒന്നു കെട്ടിപ്പിടിച്ചു കുടഞ്ഞുവിടും.

ഗ്രാൻഡ് സഫാരി