യോഗയിലും നിയമങ്ങളോ?

യോഗ ചെയ്യുമ്പോൾ ഈ നിയമങ്ങൾ പാലിച്ചില്ലെങ്കിൽ ഗുണത്തിനു പകരം ദോഷമാകും ഫലം

- ഗിരിജ ബി. നായർ

സമയം സമ്പത്താണെങ്കിൽ ആരോഗ്യം അതിനേക്കാൾ വലിയ സമ്പത്താണ്. . ആ സമ്പത്തു കാത്തു സൂക്ഷിക്കാൻ സഹായിക്കുന്ന ലളിതവും ഫലപ്രദവുമായ മാർഗങ്ങളിലൊന്നാണു യോഗ. ഇന്നു ലോകമെമ്പാടും കോടിക്കണക്കിന് ആളുകൾ യോഗയെ ജീവിതത്തിന്റെ ഭാഗമാക്കിയിരിക്കുന്നു. എന്നാൽ യോഗയുടെ യഥാർഥ ഗുണങ്ങൾ ലഭിക്കണമെങ്കിൽ ചില അടിസ്ഥാന തത്വങ്ങൾ കൃത്യമായി പാലിക്കണം. യോഗ വെറും വ്യായാമമല്ല, അതു ശരീരത്തെയും മനസ്സിനെയും ജീവിതത്തെയും ഏകീകരിക്കുന്ന അവസ്ഥയാണ്.

“ശരിയായ ശിക്ഷണത്തിൽ അഭ്യസിച്ചാൽ യോഗ സർവരോഗസംഹാരിയാണെന്നു പറയാം. എന്നാൽ കൃത്യതയില്ലാതെ യോഗാഭ്യാസം ചെയ്യുന്നതു ശാരീരിക പ്രശ്നങ്ങളുണ്ടാക്കാം. പ്രത്യേകിച്ചു നട്ടെല്ലിന്റെ ആരോഗ്യത്തിനു കൃത്യമായ പോസ്ചർ യോഗയിൽ ഏറ്റവും പ്രധാനമാണ്.''

നടുവേദന പരിഹരിക്കാനായി യോഗ പരിശീലിച്ചു തുടങ്ങി, പിൽക്കാലത്തു സിനിമാതാരങ്ങളും സമൂഹത്തിലെ പ്രമുഖരും തുടങ്ങി വിപുലമായ ശിഷ്യസമ്പത്തു നേടിയെടുത്ത 69കാരിയായ യോഗ ഗുരു ഗിരിജ ബി. നായർ പറയുന്നു.

യോഗ ചെയ്യുമ്പോൾ പാലിക്കേണ്ട കാര്യങ്ങൾ

1. കൃത്യസമയത്ത് അഭ്യസിക്കുക യോഗയ്ക്ക് ഏറ്റവും അനുയോജ്യമായ സമയം പ്രഭാതമാണ്. ബ്രഹ്മമുഹൂർത്തത്തിലോ സൂര്യോദയത്തിനു തൊട്ടു മുൻപോ ചെയ്യുന്ന അഭ്യാസം കൂടുതൽ ഫലപ്രദമാണ്. ദിവസവും ഒരേ സമയത്തു തന്നെ യോഗ അഭ്യസിക്കുന്നതു ശരീരത്തിന് ഒരു ക്രമം നൽകുന്നു.

2. ഒഴിഞ്ഞ വയറോടെ യോഗ ചെയ്യുക രാവിലെ മലമൂത്ര വിസർജനം കഴിഞ്ഞ് ഒഴിഞ്ഞ വയറോടെ യോഗ ചെയ്യുന്നതാണ് ഏറ്റവും ഉത്തമം. ഭക്ഷണം കഴിച്ച ഉടൻ യോഗ ചെയ്യരുത്. ഭക്ഷണശേഷം കുറഞ്ഞതു മുന്നോ നാലോ മണിക്കൂർ ഇടവേള നൽകണം.

3. വാം അപ് നിർബന്ധമാക്കുക നേരിട്ട് യോഗാസനങ്ങളിലേക്കു കടക്കാതെ കഴുത്ത്, തോളുകൾ, കൈകൾ, ഇടുപ്പ്, മുട്ടുകൾ, കണങ്കാൽ എന്നിവയ്ക്കായി ലളിതമായ വാം അപ് വ്യായാമങ്ങൾ ചെയ്യണം. ഇതു പേശികൾക്കു വഴക്കവും സന്ധികൾക്കു ചലനശേഷിയും നൽകും.