സിനിമ എന്ന ഭാഗ്യം

കേരള സർവകലാശാലയിൽ അസിസ്റ്റന്റ് സെക്ഷൻ ഓഫിസർ സിമ സിന്ധു കൃഷ്ണൻ കളങ്കാവലിൽ മമ്മൂട്ടിയുടെ നായികയായി. സിനിമയിൽ ചുവടുറപ്പിക്കുന്ന സിമ ജീവിതം പറയുന്നു

- വി. ആർ. ജ്യോതിഷ്

ജീവിതത്തിൽ വളരെക്കുറച്ചു സിനിമകൾ മാത്രം കണ്ടിട്ടുള്ള ഒരാളാണു ഞാൻ സിനിമയുമായി വിദൂരബന്ധം പോലുമില്ലാത്ത എന്റെ ഗ്രാമത്തിൽ ഇപ്പോഴും ഒരു സിനിമ തിയറ്റർ ഇല്ല, സമീപപ്രദേശങ്ങളിൽ ഉണ്ടായിരുന്നവയെല്ലാം കല്യാണമണ്ഡപങ്ങളായി മാറുകയും ചെയ്തു. തിരുവനന്തപുരം ജില്ലയിലെ കിഴ ക്കൻ മലയോരഗ്രാമമായ കൂനൻ വേങ്ങയിലാണ് എന്റെ നാട്. ശരിക്കു പറഞ്ഞാൽ വെഞ്ഞാറമൂടിനും നെടുമങ്ങാടിനും ഇടയ്ക്കുള്ള ഒരു കുഗ്രാമം. അച്ഛൻ കൃഷ്ണൻകുട്ടിനായർ മിലിറ്ററിയിലായിരുന്നു. അമ്മ സിന്ധു.

സിനിമാഭിനയമൊന്നും സ്വപ്നത്തിൽ പോലും ഉണ്ടായിരുന്നില്ല. നന്നായി പഠിക്കണം ജോലി വാങ്ങണം എന്നതുതന്നെയായിരുന്നു ആഗ്രഹം. നെടുമങ്ങാട് ദർശന ഇംഗ്ലിഷ് സ്കൂളിലായിരുന്നു പ്രാഥമിക വിദ്യാഭ്യാസം. പിന്നെ, നെടുമങ്ങാട് ഗവ. ഗേൾസ് ഹയർ സെക്കൻഡറി സ്കൂളിൽ പ്ലസ് ടു. മാർ ഇവാനിയോസിൽ നിന്നു ബിരുദവും വിമൻസ് കോളജിൽ നിന്നു പി.ജിയും ബി. എഡും കഴിഞ്ഞാണ് 2017-ൽ യൂണിവേഴ്സിറ്റി അസിസ്റ്റനായത്. അതിനിടയ്ക്കാണു ലോക്ഡൗൺ വന്നതും ടിക്ടോക്കിൽ വിഡിയോ ചെയ്തതുമൊക്കെ.

കോവിഡ്കാലത്ത് വീടിനുള്ളിൽ അടച്ചിരുന്നപ്പോൾ ചെയ്ത ടിക് ടോക് വിഡിയോകൾ ശ്രദ്ധിക്കപ്പെട്ടു. പലരും നല്ല അഭിപ്രായം പറഞ്ഞപ്പോൾ അഭിനയിക്കാം എന്നൊരു തോന്നൽ. എങ്കിലും അതിനുള്ള ശ്രമങ്ങൾ ഒന്നും ഉണ്ടായിരുന്നില്ല. പിന്നീടാണ് രേവതി കലാമന്ദിർ പുതിയ സിനിമയുടെ ഒഡിഷന് അപേക്ഷ ക്ഷണിച്ച പരസ്യം കാണുന്നത്. തിരുവനന്തപുരം സ്ലാങ് സംസാരിക്കുന്ന ഒരാളെയായിരുന്നു അവർ നോക്കിയത്. അങ്ങനെയാണു വാശി എന്ന സിനിമയിൽ ആദ്യമായി അഭിനയിക്കുന്നത്.

ആ സിനിമയിൽ ഒരു സീനിലേ ഉണ്ടായിരുന്നുള്ളൂ. കോടതി സീനിൽ. എങ്കിലും അതൊരു നല്ല തുടക്കമായി. ഞാനാണെങ്കിൽ ഷൂട്ടിങ് പോയിട്ട് ക്യാമറ പോലും കണ്ടിട്ടില്ല. അന്ന് എന്നെ സഹായിച്ചത് രേവതിയാണ്. ടൊവീനോയും കീർത്തി സുരേഷുമായിരുന്നു അന്നു കൂടെ അഭിനയിച്ചത്.