ദൃശ്യം to ദൃശ്യം

ദൃശ്യം സിനിമയുടെ ഒന്നിലും രണ്ടിലും സൂക്ഷിച്ച ട്വിസ്റ്റുകൾ മൂന്നാംഭാഗത്തിലും ഉണ്ടാകുമോ? വിശേഷങ്ങളുമായി അഡ്വ. ശാന്തി മായാദേവി

- വി.ആർ. ജ്യോതിഷ്

ദൃശ്യം ഒന്ന് കണ്ടിട്ട് അദ്ഭുതത്തോടെ തിയറ്ററിൽ നിന്നിറങ്ങിയ ഒരാളാണു ഞാൻ. അന്ന് ഈ സിനിമയ്ക്ക് രണ്ടാംഭാഗം ഉണ്ടാകുമെന്നോ ഞാനും അതിന്റെ ഭാഗമാകുമെന്നോ ഒരിക്കലും കരുതിയില്ല. ദൃശ്യത്തിന്റെ രണ്ടാം ഭാഗം കടന്നു മൂന്നാം ഭാഗത്തിലും എനിക്കു വക്കീലായി അഭിനയിക്കാൻ പറ്റി. ഭാഗ്യം എന്നല്ലാതെ എന്തു പറയാൻ. എന്തുകൊണ്ടും ഈശ്വരാനുഗ്രഹമുള്ള വ്യക്തിയാണു ഞാൻ എന്നാണു തോന്നിയിട്ടുള്ളത്.

അഞ്ചു വർഷം മുൻപുള്ള വ്യക്തിയല്ല ഞാനിപ്പോൾ.'' ചേർത്തലയ്ക്കടുത്ത് കാട്ടൂർ കടപ്പുറത്ത് 'വനിത'യുടെ മുഖചിത്രം ചിത്രീകരിക്കുന്നതിനിടയിൽ ശാന്തി മായാദേവി കടലിലേക്കു നോക്കി പറഞ്ഞു.

ദൃശ്യം ഒന്നിൽ നിന്നു മൂന്നിലേക്ക് എത്തുമ്പോൾ ഉണ്ടായ പ്രധാന വ്യത്യാസം?

ജോർജുകുട്ടിയുടെ മക്കൾ അഞ്ജു ജോർജും അനു ജോർജും വളർന്നു. പക്ഷേ, ജോർജുകുട്ടിയും റാണിയും പ്രായം നന്നായി കുറഞ്ഞ് ഇപ്പോഴും ചെറുപ്പക്കാരായിരിക്കുന്നു.

സിനിമയിൽ എനിക്ക് ഏറ്റവും ഇഷ്ടമുള്ള ജോടിയാണ് മോഹൻലാലും മീനയും. ഏതു സിനിമയെടുത്താലും അവർ മാസ്സാണ്.

ദൃശ്യം മൂന്നിലും കോടതി സീനുകൾ ധാരാളം വരുന്നുണ്ടോ?

കോടതി സീനുകൾ ഉണ്ട്. അതു ഷൂട്ട് ചെയ്തതു പൂത്തോട്ട എസ്എൻ ലോ കോളജിൽ സെറ്റിട്ടാണ്. ഞാൻ അവിടെ പഠിച്ചിട്ടില്ലെങ്കിലും എനിക്കു പ്രിയപ്പെട്ട ക്യാംപസാണു അവിടുത്തേത്. കോടതി സീനുകൾ നന്നായിട്ടുണ്ടെന്നു തോന്നി. ആദ്യരണ്ടു ഭാഗങ്ങളിൽ നിന്നു വ്യത്യസ്തമായ ട്രാക്കിലാണു മൂന്നാം ഭാഗത്തിന്റെ കഥ പുരോഗമിക്കുന്നത്.

സംവിധായകൻ ജീത്തു സാർ അദ്ദേഹവുമായി അസോസിയേറ്റ് ചെയ്തു നിൽക്കുന്ന പലർക്കും തിരക്കഥ വായിക്കാൻ കൊടുത്തു. അക്കൂട്ടത്തിൽ ഞാനും വായിച്ചു. പക്ഷേ, കഥയെക്കുറിച്ചു കൂടുതലൊന്നും ഇപ്പോൾ പറയാൻ കഴിയില്ല.

ജോർജുകുട്ടിയെപ്പോലെ ഒരു കക്ഷിയെ വക്കിൽ ജീവിതത്തിൽ കണ്ടിട്ടുണ്ടോ?

ഇല്ല. പക്ഷേ, ചില കക്ഷികളോടു നമുക്കു വല്ലാത്ത അടുപ്പവും സ്നേഹവും തോന്നും. അവരുടെ പ്രശ്നങ്ങൾ നമ്മുടെ കുടുംബത്തിലെ ഒരംഗത്തിന്റെ പ്രശ്നം പോലെ കൈകാര്യം ചെയ്യും. വക്കീൽ കക്ഷി ബന്ധത്തിന് അപ്പുറം നമുക്ക് അവരുടെ കാര്യങ്ങളിൽ ഒരു താൽപര്യം ഉണ്ടാവും. അതിനർഥം നമ്മളെ അന്വേഷിച്ചു വരുന്ന മറ്റു കക്ഷികളോടു താൽപര്യമില്ല എന്നല്ല. അവരോടും നമുക്കു നൂറു ശതമാനം ആത്മാർഥത തന്നെയാണ്. എങ്കിലും ചില ആൾക്കാർ നമ്മുടെ സ്വന്തമാവും.