ദൈവസ്നേഹം വർണിച്ചീടാൻ...

വത്തിക്കാനിലെ അൾത്താരയിൽ മാർപാപ്പയുടെ സവിധത്തിൽ സ്നേഹഗീതം ആലപിച്ചതിന്റെ സന്തോഷം പങ്കുവയ്ക്കുന്നു ചങ്ങാതിമാരായ സ്റ്റീഫനും വിജയും

- ബൈജു ഗോവിന്ദ്

വത്തിക്കാനിലെ ആ നിശബ്ദതയിൽ പോലും ദിവ്യമായൊരു സംഗീതമുണ്ടെന്നു തോന്നി വിജയ് യേശുദാസിനും സ്റ്റീഫൻ ദേവസിക്കും. മേലങ്കിയും അംശവടിയുമേന്തിയ മെത്രാന്മാരും പുരോഹിതരും എഴുന്നേറ്റു നിന്നു. കാരുണ്യത്തിന്റെ പ്രകാശം പോലെ ദർശനമേടയിലേക്ക് അതാ ലിയോ പതിനാലാമൻ മാർപാപ്പയെത്തുന്നു.

ആ സവിധത്തിൽ നിന്നു വിജയ് യേശുദാസ് പാടുകയാണ്. "ദൈവസ്നേഹം വർണിച്ചിടാൻ വാക്കുകൾ പോരാ'. പാട്ടിനു കൂട്ടായുണ്ടു സ്റ്റീഫൻ ദേവസിയുടെ മാന്ത്രിക വിരലുകൾ.

റോമിൽ വത്തിക്കാനിലെ വേദിയിൽ ലോക പ്രശസ്തരായ പ്രതിഭകളോടൊപ്പം മതങ്ങളില്ലാതെ മനുഷ്യരെ ഒന്നിപ്പിക്കുന്ന സംഗീത ജപമാലയിൽ ഐക്യപ്പെട്ടതിന്റെ സുകൃതമുണ്ടു സുഹൃത്തുക്കളുടെ വാക്കുകളിൽ. അതുകൊണ്ടു തന്നെ ഈ ക്രിസ്മസിനു നക്ഷത്രത്തിളക്കമേറെയുണ്ടെന്നു പറയുന്നു ഇരുവരും.

“മുൻപു മൂന്നു തവണ റോമിൽ പോയിട്ടുണ്ട്. അപ്പോഴൊന്നും ഉണ്ടായിട്ടില്ലാത്ത ചില പ്രത്യേകതകളുണ്ടായിരുന്നു നാലാം യാത്രയ്ക്ക് സ്റ്റീഫൻ ദേവസി പറഞ്ഞു തുടങ്ങി.

“വിമാനമിറങ്ങി ഹോട്ടിലേക്കു പോകുമ്പോൾ സഞ്ജന ചേച്ചി വിഡിയോ കോൾ വിളിച്ചു. പ്രോഗ്രാമിന്റെ ഔട് ലൈൻ വിശദീകരിച്ചു. (വിജയ് യേശുദാസിന്റെ അമ്മയുടെ ചേച്ചിയുടെ മകളാണു സഞ്ജന ജോൺ.) സഞ്ജന ചേച്ചിയാണു വിജയോടൊപ്പം എന്നെയും ഈ പ്രോഗ്രാമിലേക്കു ക്ഷണിച്ചത്.

We are the new world എന്നാണു പ്രോഗ്രാമിന്റെ തീം. ഞാനും വിജുവും (വിജയ് യേശുദാസ്) കൂടി ഈ വാക്കുകളുടെ സംസ്കൃതം കണ്ടെത്തി. അതിലേക്കു തമിഴും ഹിന്ദിയും മിക്സ് ചെയ്ത് ആകെ കിട്ടിയ കുറച്ചു സമയത്തിനുള്ളിൽ ട്യൂൺ സെറ്റാക്കി. ഈ സമയത്തു വീണ്ടും സന ചേച്ചി വിളിച്ചു. “മെയിൻ പ്രോഗ്രാം തുടങ്ങുന്നതിനു മുൻപ് അഞ്ചു മിനിറ്റ് നിങ്ങൾ രണ്ടാളും പെർഫോം ചെയ്യണം...'

സൗഹൃദത്തിന്റെ സ്നേഹഗീതങ്ങൾ

പ്രോഗ്രാം തുടങ്ങാൻ ആകെ 15 മിനിറ്റാണു ബാക്കിയുള്ളത്. വിജു എന്നെ നോക്കി ഞാൻ വിജുവിനേയും. ഇതുപോലെയുള്ള സന്ദർഭം ഞങ്ങൾക്കു പുതുമയല്ല. മിക്കവേദികളിലും പ്രോഗ്രാം തുടങ്ങുന്നതിന് അര മണിക്കൂർ മുൻപേ വിജു എത്താറുള്ളൂ. അപ്പോഴേക്കും ഞാൻ എല്ലാം സൈറ്റാക്കി വയ്ക്കും. ഒരുമിച്ചുള്ള റിഹേഴ്സൽ അരമണിക്കൂറാണെങ്കിലും വേദിയിൽ എത്തുമ്പോൾ മികച്ച പെർഫോമൻസായി മാറും.