இயக்குனர்களிடம் சரண்டர்.ஆகிடுவேன்!

இந்தி திரையுலகில் முன்னணி நடிகையாக வலம் வரும் வித்யா பாலன், தமிழில் நேர்கொண்ட பார்வையில் நடித்தார்.

- -தவா

வருடத்திற்கு ஓரிரு படங்கள் மட்டுமே நடிப்பேன் என கொள்கையுடன் இருப்பவர் சினிமாவில் 20 ஆண்டுகளை நிறைவு செய்திருக்கிறார். அவருடன் ஒரு அழகான சிட்சாட்.

சினிமாவில் உங்க வெற்றியை எப்படி பார்க்குறீங்க?

என்னுடைய 20 வருடகால சினிமா வாழ்க்கையில், இந்தியாவின் ஒவ்வொரு மூலை முடுக்கில் இருக்கும் பலவிதமான பெண்களின் வாழ்வியலை என் நடிப்பின் மூலமா திரையில் வெளிக்காட்டி இருக்கேன். நான் காலேஜ்'ல படிக்கும் போது லோக்கல் ட்ரெயினில் முதல் வகுப்பு பெட்டியில் போவேன். அப்போ ட்ரெயினில் உட்கார்ந்துக்கிட்டே இரவு உணவுக்கு தேவையான காய்கறிகளை வெட்டிக் கிட்டு, நிறைய கதைகளை குடும்ப பெண்கள் பேசிட்டு இருப்பாங்க. முதல் வகுப்பு பாஸ் எக்ஸ்பயரி ஆனதும், ரெண்டாம் வகுப்பும் பயணம் செய்தேன். அங்க இருந்த எனர்ஜி முற்றிலும் வேறு மாதிரி இருந்தது. ரொம்ப சத்தமா பெண்கள் அங்கேயும் பேசிட்டு இருந்தாங்க. இப்படி ஒவ்வொரு பெட்டியிலும் சொல்ல பெண்களோட கதைகள் நிறைய இருக்கு. இந்திய சினிமாவில் அப்படியான பெண்ணியம் சார்ந்த படைப்புகளுக்கு முக்கியத்துவம் கிடைச்சு வருவதில் சந்தோஷம். அந்த மாற்றத்தில் நானும் பயனடைஞ்சிருக்கேன். எனக்கு கிடைக்கும் பேர், புகழுக்கு நான் மட்டுமே உரிமை கொண்டாட முடியாது.

உங்களை தனித்துவமான நடிகையாக பார்க்குறாங்களே?

அது சந்தோஷம்தான். ஆனா, அதுக்காக நான் எதையும் பிளான் பண்ணி செய்யல. திட்டம் எதுவும் வகுக்கல. பொதுவாக ஒரு வேலை சரியா நடக்கணும்னா சரியான நேரத்தில் சரியான இடத்தில் இருக்க வேண்டியது அவசியம். என்னுடைய கெரியரில் என்னை நோக்கி வந்த எல்லா வாய்ப்புகளையும் நான் சரியா பயன்படுத்திக்கிட்டேன். வேலை செய்யணும்ங்கிற பசி எனக்குள்ள இருந்துட்டே இருக்கும். என்னோட கனவு வாழ்க்கையைத்தான் இப்போ நான் வாழ்ந்துட்டு இருக்கேன்.