పరమాత్మే - పరమగమ్యం!

సింహావలోకనం చేసుకునే వారు అత్యల్పం. వారిలో అధికులకు దొరికే సమాధానం అస్పష్టం.స్పష్టమైన సమాధానం దొరికినవారు అరుదు.

- 

అతి వేగవంతమైన ఈ ఆధునిక జీవనంలో ఒక్కొక్కరిదీ ఒక్కో లక్ష్యం. దానిని చేరుకోవడానికి అవలంబించే మార్గాలు ఎన్నో! ఆ మార్గాలలో అవాంతరాలు మరెన్నో! వాటిని దాటుకొని లక్ష్యాన్ని చేరుకొనేవారు ఏ కొందరో! వారిలో కూడా ఏ కొద్దిమందికో మాత్రమే సంతృప్తి మిగిలేది. అది కూడా అనతికాలమే! మిగిలినవారు అసంతృప్తితోనే కాలం గడుపుతారు.మరి దేని కోసం ఈ ప్రయాస? ఇంతాచేస్తే మిగిలింది ఏమిటి?

సింహావలోకనం చేసుకునే వారు అత్యల్పం. వారిలో అధికులకు దొరికే సమాధానం అస్పష్టం.స్పష్టమైన సమాధానం దొరికినవారు అరుదు. వారు దానిని అర్థం చేసుకునేసరికి మిగిలివున్నది. చిరు జీవితపు చివరి దశ. అదిగో, అప్పుడు లీలగా గుర్తుకు వచ్చింది చిన్నప్పుడు విన్న 'చదువులలో మర్మమెల్ల చదివితి తండ్రీ!' అన్న ప్రహ్లాదుని పద్యం. అప్పుడు ఎరుకకు వచ్చింది సత్యం.

ఏది గమ్యం?: సత్యానికి కాలపరిమితులు లేవు. అది ఎప్పటికీ ఒకేలా ఉంటుంది.ఆనాడు ప్రహ్లాదుడు తన తండ్రితో 'చదువులలో మర్మమంతా తెలుసు కున్నాను' అని పలికినా, ఈనాడు శ్రీరామకృష్ణులు 'ఈ భౌతిక విద్యలు కేవలం బియ్యం, అరటికాయలు మూట కట్టుకోవడానికే' అని పలికినా, వాటి అంతరార్థం మాత్రం ఒక్కటే! భగవంతుడే సత్యం.మానవజీవిత ఉద్దేశ్యం, లక్ష్యం ఆయనను సాక్షాత్కరించుకోవడం అనేదే వాటి సారాంశం.