മഹാദേവൻ മൂർത്തീഭാവങ്ങൾ

ദേവാദിദേവനെന്നും, മഹാദേവനെന്നുമൊക്കെ നമ്മൾ വിളിച്ചു പ്രാർത്ഥിക്കുന്ന ഭഗവാൻ ശിവന് നിരവധിയായ മൂർത്തി ഭാവങ്ങളാണുള്ളത്. ഈ ഓരോ മൂർത്തി ഭാവത്തോടും കൂടി ഭഗവാനെ പ്രതിഷ്ഠിച്ച് ആരാധിക്കുന്ന ക്ഷേത്രങ്ങൾ ഏതൊക്കെയാണെന്നും എവിടെയൊക്കെയാണെന്നും അറിയുന്നത് ഭക്തർക്ക് ഏറെ പ്രയോജനകരമായിരിക്കും. പ്രത്യേകിച്ച് ശിവഭക്തർക്ക്.

- പി. ജയചന്ദ്രൻ

ദക്ഷിണാമൂർത്തി

ആൽമരച്ചുവട്ടിൽ ദക്ഷിണാഭിമുഖമായിരുന്ന് സാധകന്മാർക്ക് ജ്ഞാനോപദേശം ചെയ്യുന്ന ശിവനെയാണ് ദക്ഷിണാമൂർത്തിയായി കരുതപ്പെടുന്നത്. ശുകപുരം ഗ്രാമത്തിലെ ദക്ഷിണാ മൂർത്തി ക്ഷേത്രം ഈ സങ്കൽപ്പത്തിലുള്ളതാണ്.

പരശുരാമൻ സൃഷ്ടിച്ച ഗ്രാമങ്ങളിൽ ഏറ്റവും വലിയ ഗ്രാമമായ ശുകപുരം ഗ്രാമത്തിന്റെ ഗ്രാമ ക്ഷേത്രമാണ് ശുക പുരം ദക്ഷിണാമൂർത്തി ക്ഷേത്രം. മലപ്പുറം ജില്ലയിൽ എടപ്പാളിനടുത്താണ് ഈ പുരാതനക്ഷേത്രം സ്ഥിതി ചെയ്യുന്നത്. എൻ.എച്ച്. 17 ൽ എടപ്പാൾ കവലയിൽ നിന്നും പാലക്കാട്- പൊന്നാനി റൂട്ടിൽ ഒരു കി.മീറ്റർ സഞ്ചരിച്ചാൽ ക്ഷേത്രത്തിൽ എത്തിച്ചേരാം. വേദഋഷിയായ ശുകനാണ് ഈ ക്ഷേത്രം സ്ഥാപിച്ചതെന്ന് വിശ്വസിക്കപ്പെടുന്നു. കേരളത്തിലെ ആദ്യകാല ബ്രാഹ്മണ വാസസ്ഥലങ്ങളിൽ ഒന്നുകൂടിയാണ് ശുകപുരം ഗ്രാമം. ശുകമുനി തപസ്സനുഷ്ഠിച്ച സ്ഥലമായതിനാലാണ് പ്രദേശത്തിന് ശുകപുരം എന്ന പേര് വന്നത്.

ലോകഗുരുവായി വിജ്ഞാനം പൊഴിക്കുന്ന ദക്ഷിണാമൂർത്തി ഭഗവാൻ അതുകൊണ്ടുതന്നെ വിജ്ഞാനദൈവമാണ്. സരസ്വതീദേവിക്ക് സമാനമായി വിദ്യാർത്ഥികൾ ദക്ഷിണാമൂർത്തിയെ ആരാധിച്ചാൽ വിദ്യാവിജയവും ഐശ്വര്യവും ഉണ്ടാകുമെന്നാണ് വിശ്വസിക്കപ്പെട്ടു പോരുന്നത്. വിജയദശമിദിവസം ദക്ഷിണാമൂർത്തി ക്ഷേത്രത്തിൽ വിദ്യാരംഭം നടത്തുന്നത് ഐശ്വര്യകരമാണെന്നും വിശ്വസിക്കപ്പെടുന്നു.

നീലകണ്ഠൻ

പാലാഴികടഞ്ഞപ്പോൾ ഉയർന്നുവന്ന കാളകൂട വിഷം പ്രപഞ്ച രക്ഷയ്ക്കായി ഭഗവാൻ ശിവൻ പാനം ചെയ്തു. ആ വിഷമാകട്ടെ ഭഗവാന്റെ കണ്ഠത്തിൽ കുടുങ്ങി നിന്നു. അതോടെ അവിടെ നീലനിറമായി. ആ സങ്കൽപ്പത്തിലുള്ള ശിവനാണ് നീലകണ്ഠൻ.

ചേർത്തലയ്ക്ക് സമീപമുള്ള തിരുവിഴ ക്ഷേത്രത്തിൽ ശിവനെ നീലകണ്ഠ നായി ആരാധിക്കുന്നു. കാസർഗോഡ് നീലേശ്വരത്ത് നീലേശ്വരനായും നീലകണ്ഠനെ പൂജിക്കുന്നു.