ഗണപതിക്ക് തേങ്ങയുടയ്ക്കുമ്പോൾ...

നാളികേരം ഉടയ്ക്കുമ്പോൾ അത് പൊള്ളയായ സ്വഭാവത്തെ ഇല്ലാതാക്കി അകമേയുള്ള കാമ്പിനെ പുറത്തേക്ക് കാണിക്കുന്നു എന്നാണ് വിശ്വാസം.

- തരവത്ത് ശങ്കരനുണ്ണി 9847118340

നമ്മല്ലെളാവരും വിഘ്നേശ്വരന് തേങ്ങയുടയ്ക്കാറുണ്ട്. എന്നാൽ വിഘ്നേശ്വരന് തേങ്ങയുടയ്ക്കുമ്പോൾ ശ്രദ്ധിക്കേണ്ടതായ ചില കാര്യങ്ങൾ ഉണ്ട്. ഇവ എന്താണെന്ന് തിരിച്ചറിയാൻ പലർക്കും സാധിക്കുന്നില്ല എന്നുള്ളതാണ് സത്യം.

തേങ്ങ മനുഷ്യശരീരത്തിന് തുല്യമാണ് എന്നാണ് പറയുന്നത്. കാരണം തേങ്ങ ഉടയ്ക്കുമ്പോൾ മനുഷ്യനും ദേവനും ഒന്നായി ചേരുന്നു എന്നാണ് പറയുന്നത്. ഭക്തന് ഭഗവാനോടുള്ള ആത്മീയ സമർപ്പണമാണ് തേങ്ങയുടയ്ക്കുന്നതിലൂടെ സംഭവിക്കുന്നത്.

വിഘ്നശ്വര സങ്കൽപ്പത്തിലാണ് നമ്മൾ ക്ഷേത്രത്തിൽ തേങ്ങയുടയ്ക്കുന്നത്. ഇഷ്ടകാര്യ സിദ്ധിക്കായി ഗണപതിക്ക് നാളികേരമുടയ്ക്കുന്ന വഴിപാട് സർവ്വസാധാരണമാണ്. നമ്മൾ വിചാരിച്ച കാര്യം സംഭവിക്കുമ്പോൾ നാളികേരം ഉടയുമെങ്കിൽ അഭീഷ്ടം സാധിക്കുമെന്നും ഉടഞ്ഞില്ലെങ്കിൽ അതിനു വിഘ്നം നേരിടേണ്ടി വരുമെന്നും അനിഷ്ടസംഭവം നടക്കും എന്നുമാണ് വിശ്വാസം.

നാളികേരം ഉടയ്ക്കുന്നതിനു മുൻപ് നമുക്ക് ചില കാര്യങ്ങൾ ശ്രദ്ധിക്കാവുന്നതാണ്. അവ എന്തൊക്കെയെന്ന് നോക്കാം.

എന്തുകൊണ്ട് തേങ്ങയുടയ്ക്കുന്നു?

പുരാണം അനുസരിച്ച്,  പുറംഭാഗം ഒരു വ്യക്തിയുടെ കോപം, അഹംഭാവം എന്നിങ്ങനെയുള്ള നെഗറ്റീവ് ചിന്തകളും മറുവശത്ത് ആന്തരികഭാഗം ശുദ്ധവും നിരപരാധിത്വവും എല്ലാ പോസിറ്റീവ് ചിന്തകളും ഉള്ള ഗുണങ്ങളായും കണക്കാക്കപ്പെടുന്നുണ്ട്.

നാം ഒരു തേങ്ങ പൊട്ടിക്കുമ്പോൾ, വീട്ടിലോ ക്ഷേത്രത്തിലോ ആരാധന നടത്തുമ്പോൾ അതിൽ എല്ലാ വിധത്തിലുള്ള നന്മകളും ഉണ്ട് എന്നാണ് നാം ഉറപ്പ് നൽകുന്നത്.