கௌரி விரதங்கள் பல பல...நன்மைகள் பல... பல...

கெளரி விரதம் என்றால் சிவனுடன் கூடிய பார்வதிதேவியை பூஜைசெய்து அருளை பெறுவதாகும். கௌரி என்றால் தூய்மை அல்லது வெண்மை என்று பொருள். ஆகவேதான் சுக்லபட்சத்தில் (வெளுத்த பட்சத்தில்) அம்பாள் பூஜிக்கப்படுகிறாள். ஒவ்வொரு மாதமும் சுக்லபட்சத்தில் (வளர்பிறையில்) இந்த கௌரி விரதம் வருகிறது

- அனுஷா

அனைத்து கௌரி பூஜைகளிலும் நியமங்கள் பூஜைகள், ஒரே மாதிரிதான் என்றாலும், ஒவ்வொரு மாதமும் அந்தந்த பெயருக்கேற்ப சில மாறுதல்களும் உண்டு. எல்லா கௌரி விரதம் பூஜைகளிலும் சிவனையும், அம்மனையும் சேர்த்து பூஜை செய்ய வேண்டும்.

ஒவ்வொரு மாதமும் ஒவ்வொரு மரத்தடியில் இந்த பூஜை செய்யப்படவேண்டும். அந்தந்த மரத்தின் ஒரு குச்சியை, உங்கள் வீட்டில் பூஜைக்கு பக்கத்தில் வைத்துக்கொண்டு பூஜை செய்யவேண்டியதுதான். அம்மரத்தின் இலைகளை பறித்து வந்து, பூஜை மண்டபத்தை அலங்கரித்து அல்லது அந்த இலைகள் மீது அம்மனை வைத்து பூஜிக்கலாம்.

கௌரிவிரதம் அனுஷ்டிக்கும் சுமங்கலி பெண்கள், பகல் முழுவதும் ஒன்றும் சாப்பிடாமல் விரதமிருந்து, மாலை 6 மணி முதல் 9 மணிக்குள் இந்த கௌரி பூஜையை செய்ய வேண்டும். சிவனும் பார்வதியும் சேர்ந்திருக்கும் விக்கிரகம் அல்லது படத்தை, ஒரு கோலம் போட்ட பலகையின் மேல் கிழக்கு பார்த்து வைக்கவும்.

அம்மனுக்கு வலப்புறம் நெய்தீபமும் இடது புறம் எண்ணய் தீபமும் வைக்கவும். 'விரத பூஜா விதானம்' புத்தகத்தில் உள்ள மங்கள கௌரி விரதம் பூஜை போல் எல்லா பூஜையையும் செய்ய வேண்டும். அம்மனுக்கு எதிர்திசையில் உட்கார்ந்து கொண்டு கௌரி பூஜை செய்துவிட்டு, அருகிலுள்ள சிவன் கோயில் சென்று சிவனையும், அம்பாளையும் தரிசனம் செய்துவிட்டு, பூஜையில் நிவேதனம் செய்ய வேண்டும்.