மாகாணசபையே தமிழர்களின் இரண்டாவது அரசியல் தளம்

உடனடியாக தேர்தலை நடத்துமாறு தமிழ்க் கட்சிகளின் முன்னாள் மாகாண சபை உறுப்பினர்கள் வலியுறுத்து

- நமது நிருபர்

இந்தியாவை மீறி மாகாண முறைமையை எவராலும் இல்லாது செய்துவிட முடியாது என சுட்டிக் காட்டிய வடக்கு மாகாண சபையின் முன்னாள் உறுப்பினர்கள், தமிழ் மக்களின் இருப்பை உறுதி செய்யும் மாகாணசபை முறைமையை நடை முறைப்படுத்த தேர்தலை விரைவாக நடத்த அரசு நடவடிக்கை எடுக்க வேண்டும் என்றும் வலியுறுத்தினர்.

'வன் டெக்ஸ்ட் இன்னிஷியேற்' றின் ஏற்பாட்டில் நேற்றைய தினம் யாழ்ப்பாணத்திலுள்ள தனியார் விடுதியில் வடமாகாண சபையில் கடந்த கால அனுபவங்கள் மற்றும் மாகாண சபைக்கான தேர்தலை வலியுறுத்தும் கலந்துரையாடலொன்று நடைபெறியது.

இந்தக் கலந்துரையாடலில் வடமாகாண சபையின் முன்னாள் எதிர்க்கட்சித் தலைவர் எஸ். தவராசா, அமைச்சர்களான குருகுலராஜா, கலாநிதி சர் வேஸ்வரன், உறுப்பினர்களான சபா. குகதாஸ், கேசவன் சயந்தன், கஜதீபன், ஆர்னோல்ட், சுகிர்தன், தவநாதன், கமலேந்திரன் ஆகியோர் கலந்து கொண்டனர். இந்தக் கலந்துரையாடலின் பின்னர் நடைபெற்ற ஊடகவியலாளர் சந்திப்பின்போதே அவர்கள் மேற் கண்டவாறு தெரிவித்தனர்.

குறித்த ஊடகவியலாளர் சந்திப்பின் போது இம்மானுவேல் ஆர்னோல்ட் தெரிவிக்கையில், வடக்கு மாகாண சபையில் நடைபெற்ற கடந்த காலச் செயற்பாடுகள் சம்பந்தமாக ஆராயும் சந்திப்பு ஆக்கபூர்வமானதாக இருந்தது. இதன்போது முக்கிய விடயம் மாகாண சபைகளுக்கான தேர்தல் தொடர்ந்தும் காலதாமதப்படுத்தப்படுவது தொடர்பில் அவதானம் செலுத்தப்பட்டது.

அத்துடன், மாகாண சபையை வினைத்திறனுடன் கொண்டு செல்வதற்கான ஏதுநிலைகள் குறித்து அனைத்துக் கட்சிகளும் ஒருமித்த நிலையில் கருத்துக்களை வெளிப்படுத்தியிருந்தன.