இந்தோனேசியாவில் தொடரும் பாரிய கலவரம் அரசாங்கக் கட்டிடத்துக்கு தீ வைப்பு 3 பேர் பலி

பொலிஸ் நிலையங்கள், வாகனங்கள் மீது தாக்குதல். ஜகார்த்தாவில் மட்டும் 950 பேர் கைது ; சீனாவுக்கான பயணத்தை இரத்துச் செய்தார் இந்தோனேசிய ஜனாதிபதி.

- 

இந்தோனேசிய சுலவெஸி மாகாண தலைநகர் மகஸ்ஸாரில் அரசாங்கக் கட்டிடமொன்றை ஆர்ப்பாட்டக்காரர்கள் தீ வைத்துக் கொளுத்தியதில் குறைந்தது 3 பேர் உயிரிழந்துள்ளதுடன் 5 பேர் காயமடைந்துள்ளனர்.

பல பிராந்தியங்களில் கலவரங்கள் இடம்பெற்று வருவதாகவும் அரசாங்கக் கட்டிடங்கள் பல வற்றுக்கு தீ வைக்கப்பட்டுள்ளதாகவும் தேசிய பொலிஸ் தலைவரான ஜெனரல் லிஸ்ட்யோ சிகிசத் பிரபோவோ கூறினார்.

இரவு வேளையில் இடம்பெற்ற இந்தத் தீ வைப்பு சம்பவத்தையடுத்து பல மணி நேரம் கழித்தே அதில் சிக்கி உயிரிழந்தவர்களின் சடலங்கள் மீட்கப்பட்டுள்ளன. அதேசமயம் தீயில் சிக்கியதாலும் தீப்பற்றி எரிந்த கட்டிடத்திலிருந்து குதித்ததாலும் காயமடைந்த ஐவரும் மருத்துவமனையில் அனுமதிக்கப்பட்டு சிகிச்சை பெற்று வருவதாக பிராந்திய அதிகாரிகள் தெரிவிக்கின்றனர்.

அதேசமயம் மேற்கு ஜாவா பிராந்தியத்திலுள்ள பன்டங் நகரிலும் ஆர்ப்பாட்டக்காரர்கள் கலவரத்தில் ஈடுபட்டு பிராந்தியத்திலுள்ள பாராளுமன்றக் கட்டிடத்துக்கு தீ வைத்துள்ளனர். இந்த சம்பவத்தில் எவரும் காயமடையவில்லை.