மனிதகுல முன்னேற்றத்துக்கு வழிகோலும் விண்வெளிப் பயணங்கள்

கட்டை வண்டி ஏறுகிறவன் இரயிலை வெறுப்பான்.

- 

பின் இரயிலின் அவசியத்தை உணர்ந்து இரயிலில் ஏறிப் பயணம் செய்வான். நெய் விளக்கைத் தவிர வேறு எந்த விளக்கும் கூடாது, மண்ணெண்ணெய் கூடாது என்று கூறியவர்கள் கூட இன்று மின்சார விளக்குகளைப் பொருத்தி இருக்கிறார்கள். அனுபவத்தைப் பெறுவதும், மற்றவர்கள் செய்வதை, சொல்வதைப் பற்றி சிந்திக்கும் சக்தி பெற்றிருப்பதும் மனித இனம். எனவே, மனித இனம் வாழ்வில் வளர்ச்சியடைந்து வருகிறது என்றார் தந்தை பெரியார்.

“மாறுதல் என்ற வார்த்தையைத் தவிர மற்ற எல்லாம் மாறும்" என்றார் கார்ல் மார்க்ஸ். அறிவியல் முன்னேற்றத்தால் ஏற்படும் பலவித மாற்றங்களை எம்மைப் போன்றோர், நினைத்து நினைத்து மகிழும் வண்ணம் பல்வேறு நிகழ்வுகள் உலகில் நடக்கின்றன.

கட்டை வண்டியை மட்டுமே பயணத்துக்கு நம்பிய மனிதன் இன்றைக்கு விமானத்தில் பறக்கிறான். காலையில் ஒரு நாடு, மாலையில் ஒரு நாடு என்பதெல்லாம் இன்று மிக இயல்பாக நடக்கும் பயணங்கள். ஆகாய விமானத்தால் எமக்கு கிடைத்த பயன் இது. ஒரு மனிதன் முதன் முதலில் விமானத்தில் செல்லும் பயண அனுபவம் தனித்தன்மையானது. நிறைய விமானப் பயணங்கள் செல்பவர்கள் கூடத் தங்கள் முதல் விமானப் பயண அனுபவத்தை, ஒருவித மகிழ்ச்சியோடு மற்றவர்களோடு பகிர்ந்து கொள்வதைப் பார்க்க முடியும். ஒரு நாட்டில் பிறந்த மனிதன், இன்னொரு நாட்டுக்குச் செல்வதும், அங்கேயே சில ஆண்டுகளில் குடியுரிமை பெற்று வாழ்வதுமாக மானுட வாழ்க்கை என்பது பயண வளர்ச்சியால் மகத்துவம் பெற்றிருக்கிறது.

மனிதர்களின் அடுத்த கட்டப் பயணப் பாய்ச்சல் நிகழ்ந்திருக்கிறது. விமானத்தில் பறந்து அடுத்த நாடுகளுக்குச் செல்வதுபோல, மனிதன் ரொக்கெட்டில் விண்வெளிப் பயணம் செல்வதற்கான முயற்சி வெற்றி பெற்றிருக்கிறது. இதுவரை ரொக்கெட்டில் மனிதர்கள் செல்லவில்லையா என்றால், சென்றார்கள். சரி இப்போது என்ன வேறுபாடு என்று கேட்டால், இதுவரை சென்றவர்கள் எல்லாம் விண்வெளியில் ஆராய்ச்சி செய்ய அறிவியல் அறிஞர்களால், நாடுகளால் அனுப்பப்பட்டவர்கள். 2021இல் சென்றவர்கள், ரொக்கெட்டில் உல்லாசப் பயணம் போல, சுற்றிப் பார்க்கப் போனவர்கள். ரொக்கெட்டில் சென்றார்கள், பார்த்தார்கள், திரும்பினார்கள், எவ்வளவு நேரப் பயணம், 10 நிமிடங்கள், 10 நொடிகள். இந்த 10 நிமிடங்கள், பத்து நொடிப் பயணம் என்பது ஜூலை 20, 2021ஆம் நாளை வரலாற்றில் மகத்தான நாளாக மாற்றியிருக்கிறது.