சாட்சி விசாரணைகள் நிறைவு; சமர்ப்பணத்துக்கு கால அவகாசம்

பொலிஸ்மா அதிபர் தேசபந்து தென்னக்கோனுக்கு சிறப்பு விசாரணைக் குழுவில் நியாயம் கிடைக்காது என்பதை நன்கு அறிவோம்.

- 

நியாயம் கிடைக்காது என்பதை அறிந்தே குழுவில் முன்னிலையானோம் என்று பிரதிவாதியான பொலிஸ்மா அதிபர் தேசபந்து தென்னக்கோன் தரப்பு சட்டத்தரணி சஞ்சய வீரவிக்கிரம குறிப்பிட்ட கருத்துக்கு, சட்டமா அதிபர் திணைக்களத்தின் மேலதிக சொலிசிட்டர் ஜெனரல் கடும் எதிர்ப்பை வெளிப்படுத்திய நிலையில், குழுவின் தலைவர் உயர்நீதிமன்ற நீதியரசர் பி.பி. சூரசேன அதிருப்தி தெரிவித்தார்.

பொலிஸ்மா அதிபர் தேசபந்து தென்னக்கோனை பதவி நீக்கம் செய்வதற்காக முன்வைக்கப்பட்டுள்ள குற்றச்சாட்டுக்களை ஆராய்ந்து விதப்புரைகளை முன்வைக்கும் உயர்நீதிமன்ற நீதியரசர் பி.பி.சூரசேன தலைமையிலான குழு முன்னிலையில் பிரதிவாதியான தேசபந்து தென்னக்கோன் மற்றும் சட்டமா அதிபர் திணைக்களம் சார்பு தரப்பு சாட்சியங்களை விசாரணை செய்தமை கடந்த முதலாம் திகதியுடன் நிறைவுக்குக் கொண்டு வரப்பட்டது.

2023.12.31 ஆம் திகதி மாத்தறை வெலிகம டபிள்யூ 15 ஹோட்டல் மீது கொழும்பு குற்றத்தடுப்பு பிரிவின் அதிகாரிகள் மேற்கொண்ட துப்பாக்கிப் பிரயோக சம்பவம் தொடர்பில் குழுவின் முன்னிலையில் 30 சாட்சியாளர்கள் சாட்சியமளித்திருந்தனர்.

2023.12.30ஆம் திகதி கொழும்பில் இருந்து மாத்தறை வெலிகம நோக்கிச் சென்ற கொழும்பு குற்றத்தடுப்பு பிரிவின் அதிகாரிகள் மீது 2023.12.31ஆம் திகதி அதிகாலை 2.20 மணியளவில் இனந்தெரியாத நபர்களால் துப்பாக்கிப் பிரயோகம் மேற்கொள்ளப்பட்டதாகவும், அதில் கொழும்பு குற்றத்தடுப்பு பிரிவின் பொலிஸ் பரிசோதகர் உபுல் என்பவர் உயிரிழந்ததாகவும், மதுரங்க என்ற பொலிஸ் பரிசோதகருக்கு காலில் காயம் ஏற்பட்டதாகவும் குறிப்பிடப்பட்டது.

இந்தச் சம்பவத்துடன் தொடர்புபட்ட கொழும்பு குற்றத்தடுப்புப் பிரிவின் 6 அதிகாரிகள் 2024ஆம் ஆண்டு காலப்பகுதியில் மாத்தறை நீதிவான் நீதிமன்றத்துக்கு சத்திய பிரமாண கூற்று ஊடாக '2023.12.30 ஆம் திகதி தாம் ஒரு சுற்றிவளைப்புக்காக மாத்தறை வெலிகம டபிள்யூ 15 ஹோட்டலுக்கு அருகில் சென்றதாகவும், 2023.12.31ஆம் திகதி அதிகாலை வேளையில் டபிள்யூ 15 ஹோட்டலுக்கு அருகில் கறுப்பு நிற தோள் பை அணிந்திருந்த நபர் தம்மை நோக்கி துப்பாக்கிப் பிரயோகம் மேற்கொண்டதாகவும், தாமும் துப்பாக்கிச் சூடு நடத்தியதாகவும் இந்த துப்பாக்கிச் சூட்டினால் உபுல் என்ற பொலிஸ் பரிசோதகர் உயிரிழந்ததாகவும்' குறிப்பிட்டிருந்தனர்.