மலரன்பனின் சாகித்திய விருதுபெற்ற 'கோடிச்சேலை' சிறுகதை தொகுதி சிங்கள மொழியில் 'மினி சலுவ'

ரஷ்யாவிற்கு 'மெக்சிம் கோர்க்கி' போன்று மலையகத்துக்கு மலரன்பன் என்று சிரேஷ்ட எழுத்தாளர் தெனகம சிறிவர்தன குறிப்பிடுகிறார்.

- எச்.எச். விக்கிரமசிங்க

'ஆறுமுகம் மலரன்பன் மாவத்தை' என்று அவர் வாழும் போதே வீதிக்குப் பெயர் சூட்டி பெரும் கௌரவம் பெற்ற மாத்தளை மலரன்பன் எழுதிய 'கோடிச்சேலை' என்ற சிறுகதைத் தொகுப்பைத் தமிழ் மொழியில் புலமை மிக்க காலியைச் சேர்ந்த சரத்குமார் ‘மினி சலுவ' என்ற பெயரில் மொழிபெயர்த்து இருக்கின்றார்.

ஈழத்து முன்னணி சிறுகதை எழுத்தாளர்களில் ஒருவரான மலரன்பனின் 'கோடிச் சேலை' 'மினி சலுவ' என சிங்கள மொழிபெயர்ப்பு சிறுகதை தொகுதியாக காலியில் உள்ள கலுவெல்ல சர்வதேச பௌத்த மத்திய நிலைய கேட்போர் கூடத்தில் 2025 செப்டெம்பர் 27, சனிக்கிழமை பிற்பகல் 3 மணிக்கு வெளியிடுவதற்கான ஏற்பாடுகள் செய்யப்பட்டுள்ளன.

1968 முதல் 1980 வரையிலான ஒரு தசாப்த காலத்தில் மலரன்பனால் எழுதப்பட்ட இந்த 12 சிறுகதைகள், பல்வேறு சஞ்சிகைகள் மற்றும் பத்திரிகைகளில் வெளிவந்தவையாகும். பிரதேச மற்றும் தேசிய அளவிலான விழாக்களில் விருதுகளைப் பெற்றுள்ளன. மேலும் சமூகத்துக்கு நற்கருத்துகளை வழங்கிய இச் சிறுகதைகள் , 1989இல் 'கோடிச்சேலை' என்னும் பெயரில் வெளியிடப்பட்டு அரச இலக்கிய விருதையும் பெற்றுள்ளது.