Mamre dié keer wenner

Darling in agtmanstryd geklop

- David Rossouw

Mamre en Darling se rugby-klubs het mekaar die afgelope Saterdag (26 Junie) in 'n tweede derby-stryd gepak.

Darling, wat die eerste been op 14 Maart op die Gabriel Pharoah in Darling met 37-35 gewen het, was nie hierdie keer gelukkig nie en is met 21-13 geklop.

Die tweede ontmoeting op die Mamre-sportterrein was weer eens kliphard. Darling se derdes het die eerste wedstryd 16-15 gewen, terwyl die tweede spanne 10-elk gelykop gespeel het.

Hoewel Darling die eerste ontmoeting met sy swaar pak voorspelers oorheers het, was dit hierdie keer Mamre se beurt. Mamre het reeds in die agste minuut sy krag gewys toe sy ysterman Yulin Samson ná goeie spel Darling se verdediging deurgebars en langs die pale oorgeduik het. Edwill Okkers het verdoel vir 'n voorsprong van 7-0.

Darling het egter sy kans gekry toe hy Mamre ná 19 minute uitoorlê het met pragspel tussen die voor- en agterspelers toe Ethan Edas gedruk het om die agterstand na 7-5 te verklein.

OP DIE AGTERVOET