સોશિયલ મીડિયા જેહાદઃ મજહબ વિરુદ્ધ બોલશો તો કિશન-કનૈયાલાલ જેવી બદતર હાલત થશે

સોશિયલ મીડિયામાં ધર્મ વિરુદ્ધની નાની કોમેન્ટ પણ આતંકીને ખૂંચતી હતી: ધાર્મિક ટિપ્પણીનો ડેટા ભેગો કરી કટ્ટરપંથીતે મોકલતો હતો

- 

ધંધૂકાના કિશન ભરવાડ અને ઉદયપુરના કનૈયાલાલ દરજીની એક જ ભૂલ હતી કે તેમણે સોશિયલ મીડિયામાં ધાર્મિક લાગણી દુભાય તેવી પોસ્ટ કરી હતી અને ત્યાર બાદ કટ્ટરપંથીએ તેમને મોતને ઘાટ ઉતારી દીધા હતા. આ બે ઘટના બાદ ફરીથી સોશિયલ મીડિયા જેહાદનો મામલો સામે આવ્યો છે. કેટલાક કટ્ટરપંથી લોકોએ સાબિત કરી દીધું છે કે મજહબ વિરુદ્ધ ટિપ્પણી કરશો તો કિશન અને કનૈયાલાલ જેવી બદતર હાલત થશે. ગુજરાત એટીએસની ટીમે નવસારીમાંથી ફૈઝાન શેખ નામના આતંકીની ધરપકડ કરી હતી. જે સોશિયલ મીડિયામાં ધર્મ વિરુદ્ધ ટિપ્પણી કરતા લોકોનો ડેટા ભેગો કરીને કાંઈક નવાજૂની કરવાની ફિરાકમાં હતો. ધર્મ વિરુદ્ધ ટિપ્પણી કરનાર લોકોનો ડેટા એકત્રિત કરીને અન્ય કટ્ટરપંથી અને ઝનૂની સ્વભાવના યુવકોને મોકલી આપતો હતો.

એટીએસની તપાસમાં સામે આવ્યું છે કે ફૈઝાન શેખ પ્રતિબંધિત આતંકી સંગઠનો જૈશએ-મોહમ્મદ અને અલ-કાયદાની કટ્ટરપંથી વિચારધારાથી પ્રભાવિત થયો હતો. ઓનલાઈન માધ્યમો અને અન્ય રીતે રેડિકલાઈઝ થયા બાદ તેણે સમાજમાં ભય ફેલાવવાના અને અરાજકતા ઊભી કરવાના હેતુથી ચોક્કસ જૂથની વ્યક્તિઓને ટાર્ગેટ બનાવી હતી.